भारतीय क्रिकेट संघातील वेगवान गोलंदाज उमेश यादवला त्याच्याच मॅनेजरने गंडा घातल्याचा धक्कादायक प्रकार उघडकीस आला आहे. एकेकाळचा जीवलग मित्र आणि मॅनेजर शैलेश ठाकरे याने उमेश यादवच्या बँक खात्यातून सुमारे ४४ लाख रुपये लंपास केले आहेत. आरोपीनं या रकमेतून स्वत:च्या नावे संपत्ती खरेदी केली. हा धक्कादायक प्रकार समोर आल्यानंतर उमेश यादवने पोलीस ठाण्यात तक्रार दाखल केली. पोलिसांनी शैलेश ठाकरे विरोधात विविध कलमाअंतर्गत गुन्हा दाखल केला आहे. घटनेचा पुढील तपास केला जात आहे.
नेमकं प्रकरण काय आहे?
उमेश यादव याची भारतीय क्रिकेट संघात निवड झाल्यानंतर तो अनेकदा स्पर्धेच्या निमित्ताने देशात आणि परदेशात जावं लागत होतं. या काळात उमेश यादवने आपला मित्र आणि आरोपी शैलेश ठाकरे याला आर्थिक आणि पत्र व्यवहार सांभाळण्याची जबाबदारी दिली. त्याने शैलेश ठाकरे याला पगारी मॅनेजर म्हणून नियुक्त केले.
मॅनेजर म्हणून काम करताना आरोपी शैलेशने कोणतीही कामं केली नाहीत, असा आरोप उमेश यादवने केला. दरम्यान, एक संपत्ती खरेदी करण्यासाठी उमेश यादवने आपल्या बँक खात्यात एकूण ४४ लाख रुपये ठेवले होते. पण या पैशातून उमेश यादवसाठी संपत्ती खरेदी करण्याऐवजी शैलेश ठाकरेंन स्वत:साठी संपत्ती खरेदी केली. शिवाय उमेश यादवला हे पैसेही परत दिले नाहीत. शैलेश ठाकरेंने लाखो रुपयांची फसवणूक केल्याचं लक्षात आल्यानंतर उमेश यादवने पोलीस ठाण्यात धाव घेतली.
उमेश यादवने कोराडी पोलीस ठाण्यात तक्रार दिली. पोलिसांनी विविध कलमाअंतर्गत गुन्हा दाखल केला असून आरोपी शैलेश ठाकरेचा शोध घेतला जात आहे. या घटनेचा सविस्तर तपास कोराडी पोलीस करत आहेत.
