A photo of Virat Kohli being hugged by a fan : भारत आणि अफगाणिस्तान यांच्यातील तीन सामन्यांच्या टी-२० मालिकेतील दुसरा सामना इंदूरच्या होळकर स्टेडियमवर खेळला गेला. या सामन्यात भारताने अफगाणिस्तानचा ६ विकेट्सनी पराभव केला. त्याचबरोबर मालिकेत २-० ने अशी विजयी आघाडी घेतली. या सामन्यात यशस्वी जैस्वाल आणि शिवम दुबे यांनी अर्धशतकं झळकावत विजयात मोलाचे योगदान दिले. दरम्यान या सामन्यातील विराट कोहलीचा एक फोटो सोशल मीडियावर तुफान व्हायरल होत आहे.
विराट कोहली १४ महिन्यांनंतर अफगाणिस्तानविरुद्ध टी-२० आंतरराष्ट्रीय सामन्यातून भारतीय टी-२० संघात पुनरागमन केले. या सामन्यात भारतीय संघाच्या गोलंदाजीदरम्यान, विराट कोहली सीमारेषेजवळ क्षेत्ररक्षण करत असताना, एका चाहत्याला सुरक्षा रक्षकांना चकवा देऊन मैदानात पोहोचण्यात यश आले. मैदानात उतरताच तो कोहलीकडे धावत गेला आणि त्याला मिठी मारली, या घटनेचा फोटो आता सोशल मीडियावर मोठ्या प्रमाणावर व्हायरल होत आहे.
यशस्वी जैस्वाल आणि शिवम दुबेने झळकावली अर्धशतकं –
टीम इंडियाकडून यशस्वी जैस्वाल आणि शिवम दुबे यांनी अर्धशतकी खेळी साकारली. यशस्वीने सर्वाधिक ६८ धावा केल्या. तर शिवम दुबेने नाबाद ६३ धावा केल्या. त्याने ३२ चेंडूंच्या खेळीत पाच चौकार आणि चार षटकार मारले. शिवमचा स्ट्राईक रेट १९६.८८ होता.
हेही वाचा – IND vs AFG 2nd T20 : टीम इंडिया मालिका जिंकण्यात ‘यशस्वी’! शिवम-जैस्वालने झळकावली वादळी अर्धशतकं
विराट कोहलीने १४ महिन्यानंतर टी-२० क्रिकेटमध्ये केले पुनरागमन –
विराट कोहली १४ महिन्यांनंतर परतला आहे. त्याने १६ चेंडूचा सामना करताना २९ धावा केल्या. त्याचा स्ट्राईक रेट १८१.२५ होता. रोहित शर्मा आणि जितेश शर्मा यांना खातेही उघडता आले नाही. रिंकू सिंगने नाबाद नऊ धावा केल्या. अफगाणिस्तानकडून करीम जनातने दोन गडी बाद केले. फजलहक फारुकी आणि नवीन उल हक यांनी प्रत्येकी एक विकेट घेतली.
हेही वाचा – IND vs AFG 2nd T20 : रोहित शर्माने रचला इतिहास! ‘हा’ पराक्रम करणारा ठरला जगातील पहिला पुरुष क्रिकेटपटू
अर्शदीपने सिंगने घेतल्या सर्वाधिक तीन विकेट्स –
अफगाणिस्तानकडून गुलबदिन नायबने सर्वाधिक ५७ धावा केल्या. नजीबुल्ला झाद्रानने २३, मुजीब उर रहमानने २१ आणि करीम जनातने २० धावांचे योगदान दिले. रहमानउल्ला गुरबाज आणि मोहम्मद नबी यांनी प्रत्येकी १४ धावा केल्या. कर्णधार इब्राहिम झाद्रान आठ धावा करून बाद झाला, तर अजमतुल्ला ओमरझाई दोन धावा करून बाद झाला. नूर अहमदने एक धाव घेतली. नवीन उल हक एक धाव घेत नाबाद राहिला. फजलहक फारुकीला खातेही उघडता आले नाही. अर्शदीप सिंगने सर्वाधिक तीन विकेट्स घेतल्या. अक्षर पटेल आणि रवी बिश्नोई यांना प्रत्येकी दोन यश मिळाले. शिवम दुबेने एक विकेट घेतली.
