ICC World Cup 2023: आयसीसीने एकदिवसीय विश्वचषक २०२३च्या पहिल्या सामन्यासाठी अंपायर्सची नावे जाहीर केली आहेत. भारताचे नितीन मेनन आणि कुमार धर्मसेना ५ ऑक्टोबर रोजी इंग्लंड आणि न्यूझीलंड यांच्यात होणार्‍या विश्वचषकातील सलामीच्या सामन्याची ही जबाबदारी पार पाडतील, असे आंतरराष्ट्रीय क्रिकेट परिषदेने शुक्रवारी सांगितले. माजी वेगवान गोलंदाज जवागल श्रीनाथ या सामन्यासाठी सामनाधिकारी असतील. अहमदाबाद येथे खेळल्या जाणाऱ्या या स्पर्धेच्या पहिल्या सामन्यात पॉल विल्सन टीव्ही अंपायर तर सैकत हे चौथे अंपायर असतील. आयसीसीच्या एमिरेट्स एलिट पॅनेलमधील सर्व १२ अंपायर्स असतीलच त्याशिवाय, आयसीसीच्या उदयोन्मुख अंपायर्स पॅनेलचे देखील चार सदस्य असणार आहेत. त्यामुळे एकूण १६ अंपायर्स विश्वचषक स्पर्धेच्या १३व्या आवृत्तीत काम पाहतील.
अंपायर्सच्या या यादीत लॉर्ड्स येथे २०१९च्या अंतिम सामन्यासाठी नियुक्त केलेल्या चार अंपायर्सपैकी तीन अंपायर्सचा समावेश आहे. त्यात कुमार धर्मसेना, मरायस इरास्मस आणि रॉड टकर ही नावे आहेत. या यादीतील एकमेव गायब झालेले नाव म्हणजे अलीम दार आहे, ज्यांनी यावर्षी मार्चमध्ये एलिट पॅनेलचा राजीनामा दिला होता.
माजी आंतरराष्ट्रीय क्रिकेटपटू जेफ क्रो, अँडी पायक्रॉफ्ट, रिची रिचर्डसन आणि श्रीनाथ यांचा सामनाधिकारी (रेफरी) म्हणून वन डे विश्वचषक २०२३साठी आयसीसी एलिट पॅनेलमध्ये समावेश करण्यात आला आहे. लीग टप्प्यातील सर्व सामन्यांसाठी या अधिकार्‍यांचे नामांकन करण्यात आले असून, स्पर्धेच्या उपांत्य फेरीसाठी आणि अंतिम फेरीसाठी योग्य वेळी त्यांची निवड केली जाईल आणि याबाबत नावे जाहीर केले जातील.
आयसीसीचे महाव्यवस्थापक वसीम खान म्हणाले, “या अशा प्रकारच्या स्पर्धेसाठी तुम्हाला प्रत्येक स्तरावर सर्वोत्तम कामगिरी करणाऱ्या व्यक्तींची गरज असते. अंपायर्स, रेफरी आणि या दोघांचा एक उदयोन्मुख गट हा तयार करावाच लागतो. या विश्वचषकासाठी निवडलेल्या आयसीसी एलिट पॅनेलमधील सदस्यांकडे अफाट कौशल्य, अनुभव आणि जागतिक दर्जाचे मानके आहेत. आम्ही या स्पर्धेसाठी बनवलेल्या गटाबद्दल आनंदी आहोत. ही स्पर्धा कुठल्याही वादाशिवाय निर्विघ्नपणे पार पडेल, यात मला कुठलीही शंका नाही.”
विश्वचषक स्पर्धेसाठी अंपायर्सची यादी: ख्रिस ब्राउन, कुमार धर्मसेना, मरायस इरास्मस, ख्रिस गॅफनी, मायकेल गॉफ, एड्रियन होल्डस्टॉक, रिचर्ड इलिंगवर्थ, रिचर्ड केटलबरो, नितीन मेनन, अहसान रझा, पॉल रीफेल, शराफुद्दौला इब्न शैद, रॉड टकर, अॅलेक्स वॉर्फ जोएल विल्सन आणि पॉल विल्सन.
