Fan Gifted Bracelet To Virat Kohli: भारत आणि वेस्ट इंडिज यांच्यातील तीन एकदिवसीय सामन्यांच्या मालिकेतील दुसरा सामना बार्बाडोस येथे खेळला गेला. या सामन्यात टीम इंडियाला ६ विकेट्सने पराभवाचा सामना करावा लागला . खरंतर, विराट कोहली आणि रोहित शर्मा या सामन्यात भारतीय प्लेइंग इलेव्हनचा भाग नव्हते. मात्र विराट कोहलीचा एक व्हिडीओ आता सोशल मीडियावर मोठ्या प्रमाणात व्हायरल होत आहे. विराट कोहलीने बार्बाडोसमध्ये चाहत्यांची भेट घेतली.
भारतीय फलंदाज विराट कोहली मैदानावर जितका आक्रमक आहे तितकाच तो मैदानाबाहेरही शांत आणि संयमी आहे. विराट कोहलीही त्याच्या चाहत्यांवर प्रेम करतो आणि त्यांच्या भावनांची पूर्ण काळजी घेतो. शनिवारी दुसऱ्या एकदिवसीय सामन्यात कोहलीला एका छोट्या चाहतींने एक खास भेटवस्तू दिली, जी विराट कोहलीने मनापासून स्वीकारली.
विराट कोहलीला मिळाली खास भेटवस्तू –
बीसीसीआयने रविवाकी आपल्या अधिकृत ट्विटर अकाउंटवरून एक व्हिडीओ शेअर केला आहे. ज्यामध्ये विराट कोहली आणि रोहित शर्मा चाहत्यांना भेटताना दिसत होते. जेव्हा कोहली स्टँडजवळ पोहोचला तेव्हा एका मुलीने त्याला सांगितले की, तिने त्याच्यासाठी ब्रेसलेट आणले आहे. हे ब्रेसलेट मुलीने स्वतः बनवले होते. कोहलीने ब्रेसलेट घेऊन हातावर घातले. यानंतर त्याने बाकीच्या चाहत्यांसोबत सेल्फीही काढले.
हेही वाचा – IPL 2024 चा हंगाम विदेशात होणार? जाणून घ्या काय आहे कारण
कोहलीने चाहतीच्या वडिलांचे जिंकले मन –
मुलीचे वडील बोलले आणि म्हणाले की, कोहलीने येऊन आपल्या मुलीची भेटवस्तू स्वीकारल्याबद्दल मी त्यांचा आभारी आहे. कोहलीचा औदार्य पाहून त्याला आश्चर्य वाटले. कोहलीशिवाय रोहित शर्मा आणि सूर्यकुमार यादव यांनीही चाहत्यांसोबत वेळ घालवला. या घटनेचा हा व्हिडीओ सोशल मीडियावर मोठ्या प्रमाणात व्हायरल होत आहे.
सामन्याबद्धल बोलायचे, तर भारत आणि वेस्ट इंडिज यांच्यातील एकदिवसीय मालिकेतील दुसरा सामना कॅरेबियन संघाने सहा गडी राखून जिंकला. या विजयासह वेस्ट इंडिजने तीन सामन्यांच्या मालिकेत १-१ अशी बरोबरी साधली आहे. प्रथम फलंदाजी करताना भारताने ४०.५ षटकांत सर्व १० गडी गमावून १८१ धावा केल्या होत्या. प्रत्युत्तरात वेस्ट इंडिजने ३६.४ षटकांत चार गडी गमावून १८२ धावा केल्या आणि सामना सहा गडी राखून जिंकला. या पराभवानंतर भारतीय संघावर मोठ्या प्रमाणात टीकाही होत आहे.
