मुंबई क्रिकेट संघटनेच्या सचिवपदी अभय हडप

‘‘माझा आनंद शब्दांत व्यक्त करू शकत नाही. मी कधी ‘एमसीए’चा सचिव होईन असा विचारही केला नाही. आता या पदावर आल्यावर पायाभूत सुविधा आणि मैदान कर्मचाऱ्यांसाठी मला खूप काही गोष्टी करायच्या आहे. माझा हा विजय मैदान क्लबचे सचिव आणि क्रिकेटपटूंमुळे झाला आहे. माझ्याकडे आता एका वर्षाचा कालावधी आहे. मुंबई क्रिकेट आणि मैदानांसाठी हा कार्यकाळ पुरेसा आहे. मी आता अध्यक्ष अजिंक्य नाईक आणि कार्यकारी परिषदेच्या सदस्यांसह मुंबई क्रिकेटला आणखी उंचीवर नेण्यासाठी मेहनत करेन,’’ असे हडप यांनी सांगितले.

हेही वाचा >>>‘मी कोणत्याच विश्वचषकात पहिल्या पसंतीचा खेळाडू नव्हतो…’, मोहम्मद शमीचे मोठे वक्तव्य; म्हणाला, मला संघातून…

वरळीच्या आदर्श नगर येथील रहिवासी असलेले हडप मुंबईच्या मैदानात वर्षभर स्पर्धांचे पद्धतशीर आयोजन करण्यासाठी ओळखले जातात. ‘‘हडप यांनी गेली २५ वर्षे मैदान क्रिकेटमध्ये काम पाहिले आहे. मी लहान असताना अजित नाईक १४ वर्षांखालील क्रिकेट स्पर्धेत खेळलो आहे. ही स्पर्धा सुरू करणाऱ्यांपैकी ते एक होते. आजही ते या स्पर्धेच्या आयोजनात सक्रिय सहभाग नोंदवतात. गेल्या हंगामात ‘एमसीए’ स्पर्धांच्या आयोजनातही त्यांची भूमिका महत्त्वाची होती,’’ असे ‘एमसीए’ अध्यक्ष अजिंक्य नाईक यांनी सांगितले.

नामांकितांकडून मतदान

दिग्गज क्रिकेटपटू सचिन तेंडुलकर, भारताचे माजी कर्णधार दिलीप वेंगसरकर, महिला संघाच्या माजी कर्णधार डायन एडल्जी यासह भारताचे माजी खेळाडू संजय मांजरेकर, जतीन परांजपे, करसन घावरी, समीर दिघे, सलील अंकोला आणि मुंबईचे माजी कर्णधार मिलिंद रेगे, धवल कुलकर्णी यांनी मतदान केले. रामदास आठवले, प्रसाद लाड, जितेंद्र आव्हाड, नाना पटोले यांनीही आपला मतदानाचा अधिकार बजावला.