Abhishek Sharma Fastest T20I Century: विस्फोटक फलंदाज म्हणून आपली ओळख निर्माण करणाऱ्या अभिषेक शर्माने टी-२० क्रिकेटमध्ये इतिहास रचला आहे. त्याने वेगवान शतकाच्या भारतीय विक्रमाची बरोबरी केली आहे. डावखुऱ्या सलामीवीराने सय्यद मुश्ताक अली टी-२० ट्रॉफीमध्ये मेघालयविरुद्ध सामन्यात ही ऐतिहासिक कामगिरी केली आहे. पंजाबकडून खेळताना अभिषेकने अवघ्या २८ चेंडूत आपले शतक पूर्ण केले. अशाप्रकारे त्याने गुजरातचा फलंदाज उर्विल पटेलच्या विक्रमाची बरोबरी केली आहे. T20 मधील सर्वात जलद शतकाचा विक्रम २७ चेंडूंचा आहे, एका चेंडूच्या फरकाने अभिषेक शर्मा हा विक्रम मोडण्यासाठी हुकला.
गुजरातचा यष्टिरक्षक फलंदाज उर्विल पटेलने २७ नोव्हेंबर रोजी सय्यद मुश्ताक अली टी-२० ट्रॉफीमध्ये खेळल्या गेलेल्या सामन्यात २८ चेंडूत शतक झळकावून नवा भारतीय विक्रम रचला होता. त्यानंतर त्याने ऋषभ पंतचा ३२ चेंडूत झळकावलेल्या टी-२० शतकाचा विक्रम मोडीत काढला. आता अभिषेक शर्मानेही पंतच्या पुढे जाऊन उर्विल पटेलच्या विक्रमाची बरोबरी केली आहे. अभिषेक शर्माचे टी-२० मधील हे सहावे शतक आहे.
हेही वाचा – IND vs AUS: अ‍ॅडलेड कसोटीत सलामीला कोण उतरणार? रोहित शर्माने घेतला मोठा निर्णय; म्हणाला, “मी कुठेतरी… “
मेघालयने २० षटकांत १४३ धावांच्या लक्ष्याचा पाठलाग करताना अभिषेक शर्माने २९ चेंडूत १०६ धावांची नाबाद खेळी केली. ३६५.५२ च्या स्ट्राईक रेटसह, अभिषेक शर्माने आपल्या डावात ११ षटकार आणि ८ चौकार लगावले. या खेळीदरम्यान अभिषेकने २८व्या चेंडूवर आपले शतक पूर्ण केले. अभिषेक शर्माच्या झंझावाती शतकाच्या बळावर पंजाब संघाने मेघालयविरुद्धचा सामना १० षटकांत ७ गडी राखून जिंकला. पंजाबने ९.३ षटकांत ३ गडी गमावून १४४ धावा केल्या होत्या.
सर्वात जलद टी-२० शतक झळकावणारे फलंदाज
२७ चेंडू – साहिल चौहान – एस्टोनिया विरुद्ध सायप्रस, २०२४
२८ चेंडू – उर्विल पटेल – गुजरात विरुद्ध त्रिपुरा, २०२४
२८ चेंडू – अभिषेक शर्मा – पंजाब विरुद्ध मेघालय, २०२४
३० चेंडू – ख्रिस गेल – रॉयल चॅलेंजर्स बंगळुरू विरुद्ध पुणे वॉरियर्स, २०१३
३२ चेंडू – ऋषभ पंत – दिल्ली वि हिमाचल प्रदेश २०१८
