महाकबड्डी लीगच्या तिसऱ्या दिवशी अंकित जगतापने सुवर्णचढाईत दोन गुणांची कमाई करत महिलामध्ये नगर चॅलेंजर्सला ठाणे टायगर्सवर रोमहर्षक विजय मिळवून दिला. तर पुरुषांमध्ये मुंबई डेव्हिल्स संघाने नगर चॅलेंजर्सवर ४१-३३ अशी आरामात मात केली.
भारतीय क्रीडा मंदिरात सुरू असलेल्या महाकबड्डी लीगला रविवारी कबड्डीरसिकांचा चांगला प्रतिसाद लाभला आणि त्यांना तितक्याच चित्तथरारक लढतीचा आनंद लुटता आला. महिलांमध्ये किशोरी शिंदेच्या नेतृत्वाखालील नगर आणि स्नेहल शिंदेच्या नेतृत्वाखालील ठाणे या दोन बहिणींमधील लढतीने अखेपर्यंत उत्कंठा निर्माण केली. मध्यंतराला ठाण्याने २५-२३ अशी माफक आघाडी घेतली होती. दुसऱ्या सत्रात दोन्ही संघांनी एकमेकांवर लोण चढवून ही चुरस आणखी वाढवली. कोमल देवकर आणि स्नेहल शिंदे यांनी बोनस गुण घेत अखेरच्या मिनिटाची रंगत वाढवली. मग कोमलची अखेरची चढाई निष्फळ ठरली आणि सामना ४०-४० असा बरोबरीत सुटला. परंतु अंकिताने सुवर्णचढाईत नगरला विजय मिळवून दिला. सामनावीर कोमल देवकर आणि अंकित जगतापने नगरकडून दमदार चढाया केल्या, तर क्षितिजा हिरवेने ७ पकडी केल्या. ठाण्याकडून स्नेहलने चढायांचे १२ आणि आम्रपाली गलांडेने ११ गुण मिळवले.
पुरुषांमध्ये मुंबईने १७व्या मिनिटाला नगरवर पहिला लोण चढवला, परंतु पहिल्या सत्रात मात्र १८-१८ अशी बरोबरी राहिली. दुसऱ्या सत्रात नवव्या मिनिटाला मुंबईने सांघिक क्षेत्ररक्षणाची उत्तम अदाकारी पेश करीत दुसरा लोण चढवला आणि मग सहजगत्या विजयावर शिक्कामोर्तब केले. मुंबईकडून अजिंक्य कापरेने चढायांमध्ये १४ गुणांची कमाई करीत सामनावीर किताबावर नाव कोरले. त्याला उत्तम साथ देणाऱ्या उमेश म्हात्रेने चढाईत ६ गुण मिळवले. नगरकडून सचिन पाष्टेने १२ गुण मिळवत पराभव टाळण्यासाठी झुंजार प्रयत्न केले.

या बातमीसह सर्व प्रीमियम कंटेंट वाचण्यासाठी साइन-इन करा
Skip
या बातमीसह सर्व प्रीमियम कंटेंट वाचण्यासाठी साइन-इन करा

सुवर्णचढाईचे सुवर्णयश
सर्वच सामने निर्णायक होण्यासाठी सुवर्णचढाईच्या नियमाची मात्रा महाकबड्डीमध्ये विलक्षण यशस्वी होत आहे. स्पध्रेच्या तिसऱ्या दिवशी दुसरा सामना सुवर्णचढाईमुळे निर्णायक ठरल्याने कबड्डीरसिकांच्या डोळ्यांचे पारणे फिटले. याबाबत महाकबड्डीचे संयोजक शांताराम जाधव यांनी सांगितले की, ‘‘अनेक स्पर्धामध्ये गटसाखळीत समान गुणांवर सामने बरोबरीत सुटल्याचा प्रत्यय येतो. मग अनेकदा एखाद्या बलाढय़ संघाला गटातून बाहेर काढण्याची चालसुद्धा काही संघ रचतात. मात्र महाकबड्डीमध्ये सुवर्णचढाईचा समावेश करून अशी बरोबरी साधण्याची आम्ही संधीच ठेवलेली नाही.’’

वैद्यकीय सेवेचा अभाव
नगर चॅलेंजर्सविरुद्धच्या सामन्यात मुंबई डेव्हिल्सच्या पायाला दुखापत झाल्यामुळे त्याला उर्वरित सामना खेळता आला नाही. मात्र या वेळी मैदानावर वैद्यकीय सेवेचा अभाव दिसून आला. बारामती संघाच्या एका खेळाडूला शनिवारी सामन्यादरम्यान दुखापत झाली होती. त्यामुळे सामन्यानंतर त्याला इस्पितळात नेण्यात आले. मात्र मैदानावर कोणतीही वैद्यकीय सेवा किंवा रुग्णवाहिकेची व्यवस्था करण्यात आली नसल्याने पंचाईत झाली.

स्नेहल शिंदेची झालेली पकड हा सामन्यातील निर्णायक क्षण ठरला. कोमल देवकर या सामन्यात यशस्वी गुण घेत होती. परंतु अंकिता जगतापकडे प्रतिस्पर्धी संघाच्या क्षेत्ररक्षण भेदून बोनस गुण घेण्याची क्षमता होती. त्यामुळे अंकिताला सुवर्णचढाई देण्यात आली आणि तिने हा विश्वास सार्थ ठरवला.
– किशोरी शिंदे (नगर चॅलेंजर्सची कर्णधार)