अजिंक्य रहाणे वन-डे संघात पुनरागमन करणार?? निवड समितीच्या बैठकीत नावावर चर्चा

मुंबई मिरर वृत्तपत्राने दिलेल्या बातमीनुसार, अजिंक्य रहाणेचं नाव निवड समितीच्या बैठकीत चर्चेला आलं होतं. निवड समितीमधील एका महत्वाच्या सदस्याने अजिंक्यची वन-डे संघात निवड व्हावी अशी मागणी केली. ज्यामुळे वन-डे संघाची निवड लांबणीवर पडल्याचं समजतंय. अजिंक्य संघात पुनरागमन करेल की नाही याबद्दल अजुन कोणतीही अधिकृत माहिती नसली, तरीही आगामी काळात तो वन-डे संघात पुनरागमन करण्याची शक्यता वर्तवण्यात येते आहे. २०१८ साली भारतीय संघाच्या दक्षिण आफ्रिका दौऱ्यात अजिंक्य आपला अखेरचा वन-डे सामना खेळला होता.

ऑस्ट्रेलियाविरुद्धची वन-डे मालिका संपल्यानंतर न्यूझीलंडविरुद्ध वन-डे मालिकेसाठी भारतीय संघाची घोषणा करण्यात येणार आहे. त्यामुळे या दौऱ्यात वन-डे संघासाठी अजिंक्यची निवड होते की नाही हे पाहणं महत्वाचं ठरणार आहे. दरम्यान सध्या भारत अ संघाकडून सराव सामने खेळण्यासाठी अजिंक्य न्यूझीलंड दौऱ्यावर रवाना झाला आहे.

अवश्य वाचा – रोहित शर्माला फलंदाजी करताना पाहणं ही एक पर्वणीच, माजी पाक खेळाडूने केलं कौतुक