अनुभवाने समृद्ध असा भारतीय संघ आणि तुलनेने अननुभवी असा ऑस्ट्रेलियाचा संघ गुरुवारी एकमेव ट्वेन्टी-२० सामन्यामध्ये एकमेकांशी भिडणार आहेत. सात एकदिवसीय सामन्यांच्या मालिकेआधी होणाऱ्या या सामन्यात भारतीय संघ पूर्ण ताकदीनिशी उतरत आहे. परंतु सर्वाचे लक्ष असेल ते पुनरागमन करणाऱ्या अष्टपैलू युवराज सिंगकडे.
भारतातील आगामी हंगाम हा उत्कंठापूर्ण असणार आहे, याची प्रचिती सौराष्ट्र क्रिकेट असोसिएशन स्टेडियमवर गुरुवारी होणाऱ्या या लढतीद्वारे क्रिकेटरसिकांना मिळेल. इंग्लंडविरुद्ध आगामी अ‍ॅशेस मालिकेला सामोरे जाण्यापूर्वी ऑस्ट्रेलियाची युवा फळी आपली कामगिरी उंचावण्यासाठी उत्सुक आहे. परंतु क्रिकेटरसिकांसाठी दुर्दैवाची गोष्ट म्हणजे हा सामना वाया जाण्याची शक्यता आहे. राज्यात जोरदार पाऊस पडत आहे. याशिवाय हवामान खात्यानेही गुरुवारी रात्रीपर्यंत अतिवृष्टीची शक्यता वर्तवली आहे.
भारतीय संघातील बहुतांशी खेळाडू चांगल्या सरावानिशी आंतरराष्ट्रीय हंगामासाठी सज्ज झाले आहेत. काही खेळाडू चॅम्पियन्स लीगमध्ये खेळले, तर काही भारतीय ‘अ’ संघाकडून खेळले. त्यामुळे टास्मानियाच्या जॉर्ज बेलीच्या नेतृत्वाखालील ऑस्ट्रेलिया संघापुढे भारताचे पारडे जड दिसत आहे.
आंतरराष्ट्रीय क्रिकेटमधील दोन महिन्यांच्या विसाव्यानंतर धोनीच्या नेतृत्वाखालील भारतीय संघ पुन्हा आपल्या विजयी अभियानाला प्रारंभ करील. मात्र युवराजच्या कामगिरीकडे सर्वाचे लक्ष असेल. वेस्ट इंडिज ‘अ’ संघाविरुद्धची मालिका आणि चॅलेंजर क्रिकेट स्पध्रेत त्याने लक्षवेधी कामगिरी बजावत निवड समितीचे लक्ष वेधले होते. बंगळुरूला विंडीज ‘अ’ संघाविरुद्धच्या ट्वेन्टी-२० सामन्यात त्याने ३५ चेंडूंत धडाकेबाज ५२ धावा केल्या होत्या. स्फोटक फलंदाजीप्रमाणेच डावखुरी फिरकी गोलंदाजी हे युवीचे वैशिष्टय़ आहे.
अष्टपैलू रवींद्र जडेजा आणि डावखुरा वेगवान गोलंदाज जयदेव उनाडकट हे सौराष्ट्रचे दोन खेळाडू घरच्या क्रिकेटरसिकांसमोर चमकदार कामगिरी दाखवण्यासाठी उत्सुक आहेत. चॅम्पियन्स लीगमध्ये फारशी चांगली कामगिरी न करू शकणारा
जडेजा सौराष्ट्रमध्ये पहिला ट्वेन्टी-२० सामना खेळत आहे.
संघ
भारत : महेंद्रसिंग धोनी (कर्णधार), शिखर धवन, रोहित शर्मा, विराट कोहली, सुरेश रैना, युवराज सिंग, रवींद्र जडेजा, रविचंद्रन अश्विन, इशांत शर्मा, भुवनेश्वर कुमार, रंगनाथ विनय कुमार, मोहम्मद शामी, जयदेव उनाडकट, अमित मिश्रा, अंबाती रायुडू.
ऑस्ट्रेलिया : जॉर्ज बेली (कर्णधार), नॅथन कल्टर-निले, झेव्हियर डोहर्टी, जेम्स फॉल्कनर, आरोन फिन्च, ब्रॅड हॅडिन, मोझेस हेन्रिक्स, मिचेल जॉन्सन, निक मॅडिन्सन, ग्लेन मॅक्सवेल, क्लिंट मकाय, अ‍ॅडम व्होग्स, शेन वॉटसन.
सामन्याची वेळ : सायं. ७.३० वाजल्यापासून
थेट प्रक्षेपण : स्टार क्रिकेट
आकडेवारीत ऑस्ट्रेलिया सरस
भारत आणि ऑस्ट्रेलिया यांच्यात सात ट्वेन्टी-२० सामने झाले आहेत. यापैकी चार ऑस्ट्रेलियाने, तर तीन भारताने जिंकले आहेत. भारतीय संघ अहमदाबादला पाकिस्तानविरुद्धचा अखेरचा ट्वेन्टी-२० सामना खेळला होता.
