Champions Trophy 2025 : मुंबई इंडियन्सला IPL 2025 पूर्वी मोठा धक्का! ‘हा’ स्टार खेळाडू संपूर्ण स्पर्धेतून बाहेर पडल्याने वाढली चिंता

अल्लाह गझनफर चॅम्पियन्स ट्रॉफीमधून बाहेर –

खरं तर, चॅम्पियन्स ट्रॉफी २०२५ च्या आधी, बुधवारी सकाळी बातमी आली की अफगाणिस्तानच्या प्रतिभावान खेळाडूंपैकी एक, अल्लाह गझनफर चॅम्पियन्स ट्रॉफीमधून बाहेर पडला आहे. त्याची दुखापत इतकी गंभीर आहे की तो आता आयपीएलमध्ये पण खेळू शकणार नाही. लिलावादरम्यान त्याला मुंबई इंडियन्सने खरेदी केले होते. उजव्या हाताचा फिरकी गोलंदाज अल्लाह गझनफरच्या L4 कशेरुकामध्ये फ्रॅक्चर झाले आहे, जे बरे होण्यासाठी बराच वेळ लागणार आहे. अफगाणिस्तान क्रिकेट बोर्डाने सांगितले आहे की, नुकत्याच झालेल्या झिम्बाब्वे मालिकेदरम्यान त्याला दुखापत झाली होती. आता तो किमान चार महिने क्रिकेटच्या मैदानापासून दूर राहील.

मुंबई इंडियन्सने त्याला ४.८ कोटीत केले खरेदी –

गेल्या वर्षी नोव्हेंबरमध्ये आयपीएल २०२५ चा लिलाव झाला तेव्हा त्याचे नावही त्यात समाविष्ट होते. अनेक संघ त्याला त्यांच्या संघात घेण्यास उत्सुक होते, पण शेवटी मुंबई इंडियन्सने बाजी मारली. संघाने त्याला ४.८ कोटी रुपयांना विकत घेतले होते. पण आता तो खेळू शकणार नाही आणि संघाला त्याच्या जागी दुसऱ्या फिरकी गोलंदाजाकडे वळावे लागेल. अल्लाह गझनफरने अद्याप आयपीएलमध्ये खेळलेला नाही, पण जर तो तंदुरुस्त असता तर त्याला यावेळी पदार्पणाची संधी मिळू शकली असती, पण आता त्याने ती गमावली.

आयपीएल २०२५ चा हंगाम २१ मार्चपासून सुरू होण्याची शक्यता –

आयपीएल २०२५ चा हंगाम २१ मार्चपासून सुरू होईल. बीसीसीआयने अद्याप संपूर्ण वेळापत्रक जाहीर केलेले नसले तरी, चॅम्पियन्स ट्रॉफीच्या आधी पुढील आठवड्यात संपूर्ण वेळापत्रक जाहीर केले जाईल असे मानले जाते. ते बीसीसीआय अंतिम करेल. अल्लाह गझनफरच्या जागी मुंबई इंडियन्स त्यांच्या संघात कोणाचा समावेश करते हे पाहणे बाकी आहे. तथापि, गझनफरच्या अनुपस्थितीमुळे मुंबई इंडियन्सचा कर्णधार हार्दिक पंड्याची डोकेदुखी नक्कीच वाढली आहे.