ICC Men’s T20I Cricketer of the Year 2024: सिंग इज किंग! भारताचा अर्शदीप सिंग ठरला सर्वात्कृष्ट टी-२० खेळाडू २०२४; ICCने केली घोषणा

२०२४ मध्ये भारताचा टी-२० मध्ये आघाडीचा विकेट घेणारा अर्शदीप सिंग याला आयसीसी पुरस्कारांमध्ये ICC पुरुष T20I क्रिकेटर ऑफ द इयर म्हणून निवडण्यात आले आहे. २०२४ मध्ये त्याने चेंडूने अत्यंत चांगली कामगिरी केली होती. अर्शदीप सिंगने २०२४ च्या आयसीसी पुरुष टी-२० विश्वचषक स्पर्धेत चमकदार कामगिरी केली होती. या आयसीसी स्पर्धेत तो भारताचा महत्त्वाचा गोलंदाज ठरला. अर्शदीप सिंग पॉवरप्ले आणि डेथ ओव्हर्समध्ये भेदक गोलंदाजीसाठी ओळखला जातो.

गेल्या काही वर्षांत युवा वेगवान गोलंदाज अर्शदीप सिंग हा टी-२० फॉरमॅटमध्ये टीम इंडियाचा सर्वात महत्त्वाचा गोलंदाज ठरला आहे. २०२४ मध्येही तो भारताचा टी-२० मध्ये सर्वाधिक विकेट घेणारा गोलंदाज आहे. त्याने गेल्या वर्षी टीम इंडियासाठी १८ टी-२० सामने खेळले आणि एकूण ३६ विकेट घेतल्या. अर्शदीप सिंगला आयसीसीने नुकत्याच जाहीर केलेल्या T20I टीम ऑफ द इयर २०२४ मध्ये स्थान मिळाले आहे.

दुसरीकडे १७ वर्षांनंतर भारताला टी-२० विश्वचषक जिंकून देण्यात अर्शदीप सिंगनेही महत्त्वाची भूमिका बजावली. २०२४ च्या टी-२० विश्वचषकात सर्वाधिक विकेट घेणारा तो भारतीय गोलंदाज होता. त्याने या स्पर्धेत एकूण १७ विकेट घेतल्या. अंतिम सामन्यातही अर्शदीप सिंगने ४ षटकांत २० धावा देत २ विकेटही घेतले, त्यात १९व्या षटकात त्याने केवळ ४ धावा दिल्या. हे षटक भारताच्या वर्ल्डकप विजयात महत्त्वाची भूमिका बजावणारं ठरलं.

अर्शदीप सिंगचे आंतरराष्ट्रीय क्रिकेटमध्ये पदार्पण नोव्हेंबर २०२२ मध्ये झाले होते. त्याने अवघ्या २ वर्षात टी-२० क्रिकेटमध्ये भारतासाठी सर्वाधिक विकेट घेण्याचा विक्रमही केला आहे. त्याने टीम इंडियासाठी टी-२० मध्ये आतापर्यंत ९७ विकेट घेतल्या आहेत. त्याच्या तुलनेत कोणत्याही भारतीय गोलंदाजाला हा टप्पा गाठता आलेला नाही. यापूर्वी हा विक्रम युझवेंद्र चहलच्या नावावर होता. युजवेंद्र चहलने टी-२० मध्ये टीम इंडियासाठी ९६ विकेट घेतल्या आहेत. पण अर्शदीपने इंग्लंडविरुद्धच्या टी-२० मालिकेतील पहिल्या सामन्यात त्याला मागे टाकत नवा इतिहास घडवला.