आशिया चषकाच्या आयोजनाचे भवितव्य अधांतरी! श्रीलंकेऐवजी ‘या’ देशात स्पर्धा होण्याची शक्यता

श्रीलंका क्रिकेटचे सचिव मोहन डी सिल्वा यांनी पीटीआयशी बोलताना सांगितले की, ‘आर्थिक संकटाचा सामना करणार्‍या श्रीलंकेत अनेक आठवड्यांपासून सरकारविरोधात प्रचंड निदर्शने सुरू आहेत. देशातील राजकीय अस्थिरतेमुळे आशिया चषक श्रीलंकेबाहेर हलविला जाण्याची शक्यता आहे. ही स्पर्धा यूएईमध्ये आयोजित केली जाऊ शकते.’ आशियाई क्रिकेट परिषद (एसीसी) लवकरच स्पर्धेच्या ठिकाणातील बदलाबाबत अधिकृत घोषणा करेल अशी अपेक्षा आहे. भारतीय क्रिकेट नियामक मंडळाचे (बीसीसीआय) सचिव जय शहा हे एसीसीचे प्रमुख आहेत.

हेही वाचा – शस्त्रक्रियेनंतर अवघ्या काही दिवसांतच मैदानावर उतरला राहुल! सराव करतानाचा व्हिडीओ आला समोर

सहा संघांच्या या स्पर्धेच्या तारखेत बदल होण्याची शक्यता नाही. पूर्वनिर्धारित वेळापत्रकानुसार ही स्पर्धा २६ ऑगस्ट ते ११ सप्टेंबर या कालावधीत होणार आहे. मुख्य स्पर्धेपूर्वी एक पात्रता फेरी होणार आहे. ज्यामध्ये हाँगकाँग, सिंगापूर, कुवेत आणि यूएईचे संघ पात्रता एकमेकांना आव्हान देतील. अफगाणिस्तान, पाकिस्तान, भारत, श्रीलंका आणि बांगलादेश हे पाच पूर्ण सदस्य संघ थेट प्रवेशासाठी पात्र आहेत.