Asian Games 2018 : भारताच्या खात्यात आणखी एक सुवर्ण, रोहन बोपण्णा-दिवीज शरण जोडी विजयी

कझाकिस्तानच्या डेनिस येवस्येव आणि अलेक्झांडर बब्लिक यांच्याविरुद्ध खेळणाऱ्या भारतीय जोडीने पहिल्या सेटमध्ये आपलं वर्चस्व कायम राखलं होतं. दोन्ही खेळाडूंना रोहन आणि दिवीजने पुनरागमन करण्याची संधी दिलीच नाही. अखेर ६-३ च्या फरकाने पहिला सेट जिंकत भारतीय जोडीने सामन्यात आघाडी घेतली.

दुसऱ्या सेटमध्ये कझाकिस्तानच्या जोडीने भारतीय जोडीला चांगली टक्कर दिली. बोपण्णा आणि दिवीज शरण जोडीला जोरदार प्रत्युत्तर देत कझाकिस्तानच्या खेळाडूंनी सेटमध्ये २-२ अशी बरोबली साधली. यावेळी रोहन बोपण्णाने आपला संपूर्ण अनुभव पणाला लावत सामन्यावरील आपली पकड ढिली होणार नाही याची काळजी घेतली. अखेर दुसरा सेट ६-४ च्या फरकाने खिशात घालत भारतीय जोडीने सुवर्णपदकावर आपलं नाव कोरलं.