Asian Games 2023: महाराष्ट्राच्या बीड जिल्ह्यातील अविनाश साबळेने आशियाई क्रीडा स्पर्धा २०२३मध्ये ऐतिहासिक कामगिरी करत सुवर्ण आणि रौप्य असे सलग दोन पदके जिंकली. महाराष्ट्राच्या या पठ्ठ्याने चीन भारताचा तिरंगा दिमाखात फडकावत एक इतिहास घडवला आहे. भारतीय लांब पल्ल्याच्या धावपटू अविनाश साबळेने बुधवारी आशियाई क्रीडा स्पर्धेत पुरुषांच्या ५००० मीटर शर्यतीत रौप्य पदक जिंकून आपली प्रभावी कामगिरी कायम ठेवली. साबळेचे या खेळांमधील हे दुसरे पदक आहे. गेल्या आठवड्यात त्याने ३००० मीटर स्टीपलचेसमध्ये सुवर्णपदक जिंकले.
२९ वर्षीय भारतीय खेळाडूने १३ मिनिटे २१.०९ सेकंद वेळेसह दुसरे स्थान पटकावले. बहारीनच्या बिरहानू यामाताव बालेव याने १३:१७:४० या वेळेत सुवर्णपदक पटकावले, तर त्याचाच देशबांधव दाविट फिकाडू अदमासू याने १३:२५:६३ या वेळेत कांस्यपदक पटकावले. आणखी एक भारतीय खेळाडू गुलवीर सिंगने १३:२९:९३च्या वेळेसह आपली सर्वोत्तम कामगिरी केली परंतु तो चौथ्या स्थानावर राहिला.
३००० मीटर स्टीपलचेसमध्ये सुवर्णपदक जिंकले
अविनाश साबळेने २०२३ आशियाई क्रीडा स्पर्धेत पुरुषांच्या ३००० मीटर स्टीपलचेसमध्ये ८:१९:५० सेकंद वेळेसह सुवर्णपदक जिंकले होते. यापूर्वी २०२२ आशियाई क्रीडा स्पर्धेत त्याने ३००० मीटर स्टीपलचेसमध्ये 8 मिनिटे ११.२० सेकंद वेळेसह रौप्य पदक जिंकले होते. अविनाश साबळेची हंगामातील सर्वोत्तम वेळ ८:११.६३ आहे, ज्यामुळे तो आशियाई क्रीडा स्पर्धेत जपानच्या मिउरा र्युजी (SB: ८:०९.९१)च्या मागे दुसऱ्या स्थानावर आहे.
भारतासाठी उत्तम ११वा दिवस
आशियाई क्रीडा स्पर्धेचा ११वा दिवस भारतासाठी खूप छान ठरला. भारताने एकूण १२ पदके जिंकली. यामध्ये तीन सुवर्ण, पाच रौप्य आणि चार कांस्यपदकांचा समावेश आहे. या स्पर्धेतील हा दुसरा दिवस होता जेव्हा भारताने १० हून अधिक पदके जिंकली होती. याआधी आठव्या दिवशी भारताला १५ पदके मिळाली होती.
दिवसाची सुरुवात ३५ किमी शर्यतीत कांस्यपदकाने झाली. मंजू राणी आणि राम बाबू या जोडीने देशाला दिवसाचे पहिले पदक जिंकून दिले. यानंतर ओजस आणि ज्योतीने तिरंदाजीत सुवर्णपदक पटकावले. स्क्वॉशमधील अनहत-अभयचा प्रवास कांस्यपदकावर संपला. बॉक्सिंगमध्ये प्रवीण हुडाने कांस्यपदक तर लव्हलिनाने रौप्यपदक जिंकले. ग्रीको-रोमन शैलीतील कुस्तीमध्ये कांस्यपदक जिंकण्यात सुनील कुमारला यश आले. हरमिलन बैंसने ४०० मीटर शर्यतीत रौप्यपदक तर अविनाश साबळे याने ५००० मीटर शर्यतीत रौप्यपदक पटकावले. दिवसअखेर पदकांचा पाऊस पडला. महिला रिले संघाने ४०० मीटर रिले शर्यतीत रौप्यपदक पटकावले. भालाफेक स्पर्धेत नीरज चोप्राने सुवर्ण आणि किशोर जेनाने रौप्यपदक जिंकून इतिहास रचला. दिवसाचा शेवट पुरुष संघाने ४०० मीटर रिले शर्यतीत सुवर्ण जिंकून केला. आता भारतासाठी पदकांचे शतक झळकावणे खूप सोपे होणार आहे.
भारताकडे किती पदके आहेत?
सुवर्ण: १८
रौप्य: ३१
कांस्य: ३२
एकूण: ८१
