ऑस्ट्रेलियाचे पहिल्याच दिवशी वर्चस्व

वॉर्नर आणि ईडी कोवान (३६) यांनी ९५ धावांची आक्रमक सलामी दिल्यानंतर अँजेलो मॅथ्यूसने सर्वप्रथम वॉर्नरला तंबूची वाट दाखवली. मग फिलिप ह्य़ुजेस आणि कोवान धावचीत झाल्यामुळे ऑस्ट्रेलियाची ३ बाद ११७ अशी अवस्था झाली. खेळ थांबला तेव्हा कप्तान मायकेल क्लार्क २० आणि उपकर्णधार शेन वॉटसन १३ धावांवर खेळत होते. या दोघांनाही श्रीलंकेच्या क्षेत्ररक्षकांनी एकेक जीवदान दिले.
त्याआधी, श्रीलंकेच्या डावात फक्त कुमार संगकारानेच ५८ धावांची एकाकी झुंज दिली. यष्टीरक्षक मॅथ्यम व्ॉडने त्याचा लाजवाब झेल टिपला. त्यामुळेच जॉन्सनच्या खात्यावर ४९व्या कसोटी सामन्यात २००वा बळी जमा झाला. संगकाराने आपल्या १९५व्या कसोटी डावात दहा हजार धावांचा टप्पा गाठताना सचिन तेंडुलकर आणि ब्रायन लाराच्या विक्रमाची बरोबरी साधली. होबार्ट कसोटीत न खेळणाऱ्या जॉन्सनला मेलबर्न कसोटीसाठी पाचारण करण्यात आले होते. त्याने १४ षटकांत ६३ धावांत ४ बळी मिळविण्याची किमया साधली.