Babar Azam Breaks Rohit Sharma Record: दुसऱ्या टी- २० सामन्यातही पाकिस्तानने न्यूझीलंडचा ३८ धावांनी पराभव करून पाच सामन्यांच्या मालिकेत २-० ने आघाडी घेतली आहे. या सामन्यात बाबर आझमने विश्वविक्रम करून कमाल केली. टी-२० इंटरनॅशनलमध्ये बाबरने त्याच्या करिअरचं तिसरं शतक ठोकून धमाका केला. बाबरने ५८ चेंडूत १०१ धावांची नाबाद खेळी केली. या इनिंगमध्ये त्याने ११ चौकार आणि ३ षटकार मारले. त्याच्या स्ट्राईक रेट १७४.१४ एव्हढा राहिला आहे.
बाबरच्या स्ट्राईक रेटवरून खूप चर्चा रंगली आहे. परंतु, दुसऱ्या टी-२० मध्ये पाकिस्तानी कर्णधाराने धडाकेबाज फलंदाजी करत सर्वांना आश्चर्याचा धक्का दिला. बाबरच्या धावांच्या जोरावर पाकिस्तानने प्रथम फलंदाजी करत २० षटकांत ४ विकेट्स गमावत १९२ धावा केल्या. त्यानंतर प्रत्युत्तरात न्यूझीलंडने २० षटकांत ७ विकेट्स गमावत १५४ धावाच केल्या. पाकिस्तानी गोलंदाजांनी पुन्हा एकदा कहर केला आणि किवी फलंदाजांच्या नाकीनऊ आणले. हारिस रौफने चमकदार कामगिरी करत ४ विकेट्स घेतले.
बाबर आझमचा करिष्मा
टी-२० इंटरनॅशनलमध्ये शतक ठोकणाऱ्या बाबर आझमने विश्वक्रिकेटच्या दिग्गज फलंदाजांना आव्हान दिलं आहे. टी-२० क्रिकेटमध्ये सर्वात जास्त शतकांची नोंद रोहित शर्माच्या नावावर आहे. रोहितने चार शतक ठोकले आहे. आता बाबरने ३ शतकांपर्यंत पोहोचल्याने येणाऱ्या काळात तो रोहित शर्माचा विक्रम मोडेल, असे संकेत त्याच्याकडून देण्यात आले आहेत. आतापर्यंत तीन शतक ठोकण्याची कामगिरी अनेक खेळाडूंनी केली आहे. यामध्ये सूर्यकुमार यादव, कॉलिन मुनरो, एस डाविजी, ग्लेन मॅक्सवेल यांच्या नावाचा समावेश आहे.
टी-२० क्रिकेटमध्ये ३ शतक ठोकणारा जगातील पहिला कर्णधार
बाबरने टी-२० इंटरनॅशनलमध्ये तीन शतक ठोकणारा जगातील पहिला कर्णधार बनला आहे. बाबरशिवाय अन्य कोणत्याही कर्णधाराने अशी कामगिरी केली नाहीय. याआधी बाबरने २०२१ मध्ये दक्षिण आफ्रिकेविरुद्ध, तसंच २०२२ मध्ये इंग्लंडविरोधात टी-२० इंटरनॅशनलमध्ये शतक ठोकलं होतं. रोहित शर्माने कर्णधार म्हणून टी-२० क्रिकेटमध्ये २ शतक ठोकले आहेत.
