बॅडमिंटन : सिंधू उपांत्य फेरीत

भारताचे आशास्थान असलेल्या पी. व्ही. सिंधूने मकाऊ खुल्या बॅडमिंटन स्पर्धेतील उपांत्य फेरीत स्थान मिळवले आहे आणि विजेतेपदची हॅट्ट्रिक साधण्याच्या आशा कायम ठेवल्या आहेत. सिंधूने चुरशीच्या लढतीत चीनच्या चेन येफुईवर २१-१३, १८-२१, २१-१४ असा रोमहर्षक विजय मिळवला. या स्पर्धेत आव्हान राहिलेली ती एकमेव भारतीय खेळाडू आहे. १५व्या मानांकित साईप्रणीतला सव्वा तासाच्या लढतीनंतर गोहसुआन हुआतकडून १६-२१, २३-२१, १३-२१ असा पराभव स्वीकारावा लागला. उत्कंठापूर्ण लढतीत त्याने दुसरा गेम घेतल्यानंतर खेळावरील नियंत्रण गमावले. सातव्या मानांकित प्रणॉयला इंडोनेशियाच्या एहसान मौलाना मुस्तफाने १८-२१, २१-१९, २१-११ असे हरवले.