आयपीएलच्या स्पॉट-फिक्सिंग प्रकरणाच्या सर्वोच्च न्यायालयाच्या सुनावणीनंतर साऱ्यांचेच लक्ष आता भारतीय क्रिकेट नियामक मंडळाच्या (बीसीसीआय) आगामी वार्षिक बैठकीकडे लागलेले आहे. बीसीसीआयच्या कार्यकारिणी समितीची बैठक ८ फेब्रुवारीला होणार असून, यामध्येच वार्षिक बैठकीची तारीख ठरवण्यात येणार आहे. या बैठकीनंतर एन. श्रीनिवासन यांचे पुढचे पाऊल नेमके काय असेल, याचा अंदाज लावला जाऊ शकतो.
कार्यकारिणी समिती सदस्य ७ फेब्रुवारीला चेन्नईमध्ये बैठकीसाठी पोहोचणार असून, यापूर्वी समितीमधील काही सदस्यांची भेट एन. श्रीनिवासन घेणार असल्याची माहिती सूत्रांनी दिली आहे. त्यामुळे कार्यकारिणीच्या बैठकीपूर्वीच एन. श्रनिवासन आणि त्यांच्या सहकाऱ्यांची रणनीती ठरणार आहे.
‘‘बीसीसीआयच्या कार्यकारिणीच्या बैठकीबाबतचे पत्र आम्हाला मिळाले आहे. या समितीचे सदस्य अनौपचारिकपणे ५ फेब्रुवारीला एकत्र भेटणार आहेत, त्यावेळीच एन. श्रीनिवासन समिती सदस्यांची भेट घेऊन पुढील रणनीती आखणार आहेत,’’ असे बीसीसीआयच्या कार्यकारिणी समितीमधील एका सदस्याने सांगितले.
२२ जानेवारीला सर्वोच्च न्यायालयाने दिलेल्या निर्णयानुसार एन. श्रीनिवासन यांना हितसंबंधांमुळे बीसीसीआयची निवडणूक लढवता येणार नाही. पण जर त्यांनी चेन्नई सुपर किंग्ज संघाची मालकी सोडल्यास त्यांना निवडणूक लढवता येऊ शकते, त्यामुळे श्रीनिवासन चेन्नई संघाची मालकी सोडतील, अशी चर्चा क्रिकेट वर्तुळात सुरू आहे.
फॉल्कनर सलामीच्या लढतीला मुकणार
मेलबर्न : ऑस्ट्रेलियाचा अष्टपैलू खेळाडू जेम्स फॉल्कनर दुखापतीमुळे विश्वचषकाच्या सलामीच्या लढतीत खेळू शकणार नाही. यजमान ऑस्ट्रेलियाची सलामीची लढत १४ फेब्रुवारीला पारंपरिक प्रतिस्पर्धी पोटाच्या स्नायूंना झालेल्या दुखापतीमुळे फॉल्कनरला इंग्लंडविरुद्ध खेळता येणार नाही. तिरंगी एकदिवसीय मालिकेत इंग्लंडविरुद्धच्याच लढतीत खेळताना फॉल्कनरला ही दुखापत झाली होती. मात्र फॉल्कनरची दुखापत गंभीर नसून, पुढच्या लढतींकरता तो उपलब्ध असेल असे संघाचे फिजिओथेरपिस्ट अ‍ॅलेक्स कोऊंटोरिस यांनी स्पष्ट केले.
