BCCI to release INR 1 crore for Anshuman Gaekwad’s cancer treatment : भारतीय क्रिकेट संघाचा माजी फलंदाज अंशुमन गायकवाड कर्करोगाशी झुंज देत आहेत. त्यांना ब्लड कॅन्सर असून ते लंडनमध्ये होते. ते आता बडोद्याला परतले आहेत. त्यांच्यावर येथे उपचार सुरू आहेत. भारताकडून खेळण्याबरोबरच त्यांनी संघाचे प्रशिक्षकपदही भूषवले आहे. १९९७ ते १९९९ आणि पुन्हा २००० मध्ये त्यांनी भारतीय क्रिकेट संघाचे मुख्य प्रशिक्षक म्हणून काम पाहिले. बीसीसीआयने गायकवाड यांच्या उपचारासाठी मदत करण्याची घोषणा केली आहे.
बीसीसीआयने एक कोटी रुपये देण्याची केली घोषणा –
बीसीसीआयचे सचिव जय शाह यांनी बीसीसीआयला अंशुमन गायकवाडला आर्थिक मदत देण्यासाठी तातडीने एक कोटी रुपये जारी करण्याचे निर्देश दिले. जय शाह यांनी गायकवाड यांच्या कुटुंबीयांशीही बोलून परिस्थितीचा आढावा घेतला आणि मदत जाहीर केली. याबाबत बीसीसीआयच्या सर्वोच्च परिषदेने माहिती दिली.
कपिल देव यांनी बीसीसीआयकडे केली होती मागणी –
अंशुमन गायकवाड कपिल देव ते सुनील गावसकर यांसारख्या दिग्गज खेळाडूंसोबत खेळले आहेत. बीसीसीआयने त्यांना मदत करावी, असे कपिल देव यांनी नुकतेच म्हटले होते. विश्वचषक विजेत्या कर्णधाराने म्हटले होते, मला आशा आहे की बोर्ड त्याची काळजी घेईल. आम्ही कोणावरही जबरदस्ती करत नाही. त्यामुळे अंशूला कोणतीही मदत मनापासून करावी. त्याने वेगवान गोलंदाजांचे खूप चेंडू आपल्या शरीरावप झेलले आहेत. आता त्याच्यासाठी उभे राहण्याची वेळ आली आहे.
हेही वाचा – ‘आता सगळेच विसरलेत…’, रोहित शर्माला कर्णधार बनवल्याने शिवीगाळ करणाऱ्यांना सौरव गांगुलीचे चोख प्रत्युत्तर
माजी सहकारी देखील मदत करत आहेत –
स्पोर्टस्टारमधील एका वृत्तानुसार, सुनील गावसकर, रवी शास्त्री, दिलीप वेंगसरकर, मोहिंदर अमरनाथ, संदीप पाटील, मदन लाल आणि कीर्ती आझाद यांच्यासह अनेक माजी भारतीय क्रिकेटपटू गायकवाड यांना मदत करण्यासाठी पैसे गोळा करण्यासाठी मित्र आणि कॉर्पोरेटशी संपर्क साधत आहेत. गायकवाड यांनी १९७४ मध्ये भारतासाठी पदार्पण केले होते. त्यांनी ४० कसोटी आणि १५ एकदिवसीय सामने खेळले. १९७५ आणि १९७९ च्या वर्ल्ड कपमध्येही तो टीम इंडियाचा भाग होता.
