स्कॉटलंडचा अष्टपैलू कॅलम मॅक्लिओडने आंतरराष्ट्रीय क्रिकेटमधून निवृत्ती जाहीर केली आहे. कॅलम मॅक्लिओड शेवटचा सामना टी-२० विश्वचषक २०२२ मध्ये खेळला होता. २१ ऑक्टोबर रोजी त्याने झिम्बाब्वेविरुद्ध शेवटचा सामना खेळला होता. ३३ वर्षीय कॅलम मॅक्लिओडने २००७ मध्ये आंतरराष्ट्रीय क्रिकेटमध्ये पदार्पण केले होते.
कॅलम मॅक्लिओडने झिम्बाब्वेविरुद्धच्या शेवटच्या सामन्यात 25 धावा केल्या, ज्यामध्ये स्कॉटलंडचा पाच विकेट्सनी पराभव झाला आणि स्कॉटलंडचा संघ टी-२० विश्वचषक सुपर-१२ साठी पात्र ठरू शकला नाही.
कॅलम मॅक्लिओडची कामगिरी –
मॅक्लिओड हा स्कॉटलंडचा सर्वात अनुभवी खेळाडू आहे. त्याने संघासाठी पाच विश्वचषक खेळले आहेत. कॅलम मॅक्लिओडने इंग्लंडविरुद्ध १४० धावा केल्या, ही त्याच्या कारकिर्दीतील सर्वोत्तम खेळी असल्याचे म्हटले जाते. २०१८ मध्ये, कॅलम मॅक्लिओडच्या या खेळीमुळे स्कॉटलंडने इंग्लंडविरुद्धचा एकदिवसीय सामना सहा धावांनी जिंकला. त्याने २०१४ मध्ये कॅनडाविरुद्ध १७५ धावा केल्या होत्या, ही त्याची एकदिवसीय क्रिकेटमधील सर्वोत्तम धावसंख्या आहे.
कॅलम मॅक्लिओडची क्रिकेट कारकीर्द –
कॅलम मॅक्लिओडने स्कॉटलंडकडून ८८ एकदिवसीय आणि ६४ टी-२० आंतरराष्ट्रीय सामने खेळले आहेक. त्याच्या नावावर ८८ एकदिवसीय सामन्यांमध्ये १० शतके आणि १३ अर्धशतकांसह ३०२६ धावा आहेत. त्याचबरोबर ६४ टी-20 सामन्यांमध्ये सात अर्धशतकांसह १२३८ धावा केल्या आहेत. याशिवाय त्याने २८ प्रथम श्रेणी, १६१ लिस्ट ए आणि १३७ टी-२० सामने खेळले आहेत.
