Lucknow Super Giants Coach: आयपीएल २०२३च्या मोसमात लखनऊ सुपर जायंट्स संघाची कामगिरी चांगली होती. लखनऊ सुपर जायंट्सचा संघ अंतिम फेरीपर्यंत पोहोचू शकला नसला तरी गुणतालिकेत हा संघ तिसऱ्या क्रमांकावर होता. लखनऊ सुपर जायंट्सचा कर्णधार के.एल. राहुल दुखापतीमुळे संपूर्ण हंगाम खेळू शकला नाही. मात्र, आता लखनऊ सुपर जायंट्सशी संबंधित मोठी बातमी येत आहे. वास्तविक, ऑस्ट्रेलियाचा माजी सलामीवीर जस्टिन लँगर लखनऊ सुपर जायंट्स संघाचा नवा प्रशिक्षक होऊ शकतो. सध्या या संघाचे प्रशिक्षक अँडी फ्लॉवर आहेत. तर गौतम गंभीर संघाच्या मार्गदर्शकाच्या भूमिकेत आहे आणि त्यातही कदाचित बदल होऊ शकतो.
जस्टिन लँगरची कारकीर्द कशी होती?
मीडिया रिपोर्ट्सनुसार, जस्टिन लँगर लखनऊ सुपर जायंट्स संघाचे नवे प्रशिक्षक असतील. जस्टिन लँगरच्या कारकिर्दीवर जर एक नजर टाकली तर या खेळाडूने ऑस्ट्रेलियाकडून १०५ कसोटी सामने खेळले आहेत. याशिवाय या खेळाडूने ८ एकदिवसीय सामन्यांमध्ये कांगारूंचे प्रतिनिधित्व केले. तसेच जस्टिन लँगरने ऑस्ट्रेलियाच्या प्रशिक्षकाची भूमिका निभावली आहे. या १०८ कसोटी सामन्यांमध्ये जस्टिन लँगरने ७६९६ धावा केल्या. जस्टिन लँगरने कसोटी सामन्यात २३ शतके झळकावली आहेत. याशिवाय जस्टिन लँगरने पन्नास धावांचा आकडा ३० वेळा पार केला. जस्टिन लँगरच्या नावावर कसोटी फॉरमॅटमध्ये ३ द्विशतके आहेत.
आयपीएल २०२३च्या हंगामात लखनऊ सुपर जायंट्सने अशीच कामगिरी केली
मात्र, आयपीएल २०२३ हंगामातील लखनऊ सुपर जायंट्सच्या कामगिरीबद्दल जर बोलायचे झाले तर, हा संघ गुणतालिकेत तिसऱ्या क्रमांकावर राहिला होता. आयपीएल २०२३च्या हंगामात, लखनऊ सुपर जायंट्सने १५ सामने खेळले. लखनऊ सुपर जायंट्सने या १५ सामन्यांमध्ये ८ विजय मिळवले आणि ७ सामन्यात पराभवाचा सामना करावा लागला. या मोसमात संघाचा नियमित कर्णधार के.एल. राहुल दुखापतीमुळे संपूर्ण हंगाम खेळू शकला नाही. के.एल. राहुलच्या अनुपस्थितीत अष्टपैलू क्रुणाल पांड्याने लखनऊ सुपर जायंट्सच्या कर्णधाराची भूमिका बजावली.
लखनऊ सुपर जायंट्सचा मेंटॉर गौतम गंभीर आणि रॉयल चॅलेंजर्स बंगळुरूचा माजी कर्णधार विराट कोहली यांच्यात लाइव्ह सामन्यात जबरदस्त भांडण झालं होतं. बीसीसीआयच्या शिस्तपालन समितीने या दोघांकडून १०० टक्के मॅच फी दंड म्हणून वसूल केली होती. त्यानंतरही माजी खेळाडू गंभीर या वादावर कमेंट करून चर्चेत होता. आता त्याची पुन्हा चर्चा रंगलीय आणि यावेळी त्याच्यासोबत लखनऊचा प्रवास संपवणार अशी माहिती समोर येतेय. त्याबद्दल अद्याप कुठलीही अधिकृत माहिती संघाच्या वरिष्ठांनी दिलेली नाही.
