Wimbledon 2024 Carlos Alcaraz vs Novak Djkovic: कार्लोस अल्काराझने नोव्हाक जोकोविचचा अंतिम फेरीत पराभव करत विम्बल्डन २०२४चे जेतेपद पटकावले आहे. या विजयासह कार्लोस अल्काराझने सलग दुसऱ्यांदा विम्बल्डनचे विजेतेपद जिंकले. अल्काराझने अंतिम फेरीत जबरदस्त कामगिरी करत सरळ सेटमध्ये दिग्गज टेनिसपटू नोवाक जोकोविचला नमवले. २१ वर्षीय कार्लोस अल्काराझने पहिला आणि दुसरा सेट ६-२, ६-२ असा जिंकला. मात्र, तिसऱ्या सेटमध्ये नोवाकने चांगली सुरुवात केली होती. हा सेट ६-६ असा बरोबरीत होता, त्यानंतर टायब्रेकरमध्ये निर्णय घेण्यात आला. सुरुवातीपासूनच नोव्हाक जोकोविचवर अल्काराझ वरचढ दिसत होता. त्याने या माजी चॅम्पियन खेळाडूला पहिल्या सेटमध्ये टिकून राहण्याची संधी दिली नाही आणि ६-२ च्या फरकाने सहज जिंकला. दुसऱ्या सेटमध्येही सारखीच कामगिरी करत अल्काराझने तो सेट ६-२ ने जिंकला. तिसऱ्या सेटमध्ये नोव्हाकने झुंज दिली आणि सामना टायब्रेकरपर्यंत नेण्यात यश मिळविले पण ते पुरेसे नव्हते. ७-६ अशा फरकाने शेवटचा सेट जिंकून अल्काराझने विजेतेपदावर कब्जा केला. २०२३ मध्येही हे दोन्ही टेनिसपटू विम्बल्डनच्या अंतिम सामन्यात आमनेसामने आले होते, जिथे अल्काराझने बाजी मारली होती. हेही वाचा - IND vs ZIM: एका चेंडूत १३ धावा! यशस्वी जैस्वालचा दुर्मिळ विक्रम, T20I च्या इतिहासात ‘ही’ कामगिरी करणारा पहिला फलंदाज कार्लोस अल्काराझने रचला इतिहास २१ वर्षीय अल्काराझने अंतिम सामन्यात विजय मिळवण्याचा विक्रम कायम ठेवत आणखी एक ग्रँडस्लॅम जिंकले. अल्काराझने २०२२ मध्ये यूएस ओपनच्या रूपाने त्याच्या कारकिर्दीतील पहिले ग्रँड स्लॅम जेतेपद जिंकले होते. फ्रेंच ओपन आणि Wimbledon सलग जिंकणारा अल्काराझ आता सहावा खेळाडू ठरला आहे. एटीपी क्रमवारीत अव्वल स्थानी पोहोचणारा आणि गवत, माती आणि हार्ड कोर्टवर विजेतेपद पटकावणारा अल्काराझ, वयाची २२ वर्षे पूर्ण होण्यापूर्वी दोन विम्बल्डन विजेतेपद पटकावणारा बोरिस बेकर आणि ब्योर्न बोर्ग यांच्यानंतरचा तिसरा खेळाडू ठरला आहे. हेही वाचा - IND vs ZIM: अभिषेक शर्माचा पदार्पणाच्या मालिकेत अनोखा विक्रम, टी-२० मध्ये ‘ही’ कामगिरी करणारा भारताचा पहिला खेळाडू सर्बियाच्या नोव्हाक जोकोविचचे २४वे ग्रँडस्लॅम जिंकण्याचे स्वप्न कार्लोस अल्काराझमुळे अपुरे राहिले. दुखापतीनंतर पुनरागमन करणाऱ्या या महान खेळाडूला २१ वर्षीय तरुणाने जिंकण्याची संधी दिली नाही.
