Champions Trophy 2025 Yashasvi Jaiswal selected in Indian squad : चॅम्पियन्स ट्रॉफी २०२५ साठी आणि इंग्लंडविरुद्धच्या वनडे मालिकेसाठी रोहित शर्माच्या नेतृत्त्वाखालील भारतीय संघाची घोषणा करण्यात आली आहे. या स्पर्धेसाठी भारतीय संघात युवा आणि अनुभवी खेळाडूंना संधी मिळाली आहे. तसेच उपकर्णधारपदाची जबाबदारी शुबमन गिलकडे सोपवण्यात आली आहे. विशेष म्हणजे या वनडे संघात पहिल्यांदाच यशस्वी जैस्वाल संधी देण्यात आली आहे.
यशस्वी जैस्वालची भारताच्या एकदिवसीय संघात पहिल्यांदाच निवड झाली आहे. अशा परिस्थितीत यशस्वी जैस्वाल चॅम्पियन्स ट्रॉफीपूर्वी एकदिवसीय क्रिकेटमध्ये पदार्पण करण्याची शक्यता आहे. यशस्वीने आतापर्यंत करिअरमध्ये केवळ कसोटी आणि टी-२० सामने खेळले आहेत. त्याची निवड करण्यबाबत कर्णधार रोहित शर्माने प्रतिक्रिया दिली आहे.
यशस्वीच्या निवडीवर रोहित काय म्हणाला?
रोहित शर्मा म्हणाला, “गेल्या ६-८ महिन्यांत त्याने जी काही कामगिरी केलीय त्याच्या आधारे आम्ही त्याची निवड केली आहे. तो आतापर्यंत एकदिवसीय खेळला नाही, पण आम्ही त्याची निवड केली आहे. त्याने क्षमता दाखवली आहे. कधीकधी आपल्याला हे करण्याची आवश्यकता असते. प्रत्येकाबद्दल बोलायचे तर आपण सर्वांना संतुष्ट करू शकत नाही. होय, हा एक कठीण निर्णय आहे, परंतु आम्हाला तो घेणे आवश्यक आहे.”
यशस्वी जैस्वालची आतापर्यंतची कामगिरी –
यशस्वी जैस्वालच्या आंतरराष्ट्रीय क्रिकेटमधील कामगिरीबद्दल सांगायचे तर, तो आतापर्यंत १९ कसोटी खेळला आहे. या कालावधीत त्याने ३६ डावांमध्ये ५२.८८ च्या सरासरीने आणि ६५.६६ च्या स्ट्राईक रेटने १७९८ धावा केल्या आहेत. यशस्वीच्या नावावर कसोटीत १० अर्धशतके आणि ४ शतके आहेत. या फॉरमॅटमध्ये त्याची सर्वोच्च धावसंख्या नाबाद २१४ आहे. त्याचबरोबर २३ टी-२० आंतरराष्ट्रीय सामन्यांच्या २२ डावात ७२३ धावा केल्या आहेत. या फॉरमॅटमध्ये ५ अर्धशतकांसह त्याने एक शतक झळकावले आहे.
चॅम्पियन्स ट्रॉफी २०२५ साठी भारताचा १५ सदस्यीय संघ –
रोहित शर्मा (कर्णधार), शुबमन गिल (उपकर्णधार), विराट कोहली, श्रेयस अय्यर, केएल राहुल, हार्दिक पंड्या, अक्षर पटेल, वॉशिंग्टन सुंदर, कुलदीप यादव, जसप्रीत बुमराह, मोहम्मद शमी, अर्शदीप सिंग, यशस्वी जैस्वाल, ऋषभ पंत, रवींद्र जडेजा.
