ICC U19 World Cup: अंतिम सामना होईपर्यंत खेळाडूंवर द्रविडने घातली ‘मोबाईल बंदी’

भारताच्या १९ वर्षाखालील संघाने पाकिस्तानचा पराभव करत १९ वर्षाखालील विश्वचषक स्पर्धेच्या अंतिम फेरीत दणक्यात प्रवेश केला. सांघिक खेळाच्या जोरावर पृथ्वी शॉच्या टीमने एकही सामना न गमावता अंतिम सामन्यात दण्यात प्रवेश केला आहे. मात्र ऑन फिल्डबरोबरच ऑफ फिल्ड असताना राहुल द्रविडच्या मार्गदर्शनाचा हा परिणाम असल्याचे म्हटले तरी वावगे ठरणार नाही. द्रविड सरांचा हा संघ खूपच शिस्तप्रिय असल्याचे मागील सामन्यामध्ये दिसून आले. द्रविड वेळोवेळी या तरुण खेळाडूंना मोलाचे सल्ले देत आला आहे. आयपीएल लिलावाकडे लक्ष न देता विश्वचषक स्पर्धेवर लक्ष देण्याचा सल्ला त्याने खेळाडूंना दिलेला. केवळ आणि केवळ खेळावर या मुलांचे लक्ष केंद्रित रहावे म्हणून द्रविडने आणखीन एक नियम आपल्या संघासाठी घालून दिला आहे. एकाग्र चित्ताने केवळ खेळातील बारकाव्यांवर लक्ष्य देऊन खेळात सुधारणा करता यावी या उद्देशाने द्रविडने या संघातील खेळाडूंवर मोबाईल बंद ठेवण्याचा आदेशच दिला आहे. विश्वचषकाचा अंतीम सामना होईपर्यंत या संघातील कोणताही खेळाडू आपला मोबाईल वापरणार नाही असा नियमच द्रविडने बनवला आहे.