Commonwealth Games: भारतीय खेळाडूंची चमकदार कामगिरी; उंच उडी, ज्युडो, वेटलिफ्टिंग आणि स्क्वॉशमध्ये केली पदकांची कमाई

तेजस्वीन शंकरने २.२२ मीटरची उंच उडी घेत कांस्य पदकाला गवसणी घातली. २३ वर्षीय तेजस्वीनने अॅथलेटिक्स प्रकारातील उंच उडीमध्ये ही कौतुकास्पद कामगिरी करत पहिल्यांदाच या प्रकारात राष्ट्रकुल स्पर्धांमध्ये भारताच्या नावावर पदकाची नोंद केलीय. “मी फार आनंदी आहे की मला पदक जिंकता आलं आणि मी अॅथलेटिक्समध्ये भारताचं खातं उघडलं. माझ्यावर विश्वास ठेवणाऱ्या आणि मला संधी देणाऱ्या प्रत्येकाचा मी आभारी आहे. मला वाटतं राष्ट्रकुल स्पर्धांमधील उंच उडीमधील हे भारताचं पाहिलं पदक आहे,” असं मत तेजस्वीनने विजयानंतर व्यक्त केलं.

दुसरीकडे सुवर्णपदकाच्या सामन्यात पराभूत झाल्याने तुलिका मान ज्युडोमध्ये रौप्य पदकावर समाधान मानावे लागले. अंतिम फेरीत स्कॉटलंडची गतविजेती अॅडलिंग्टनकडून तुलिका पराभूत झाली. २०२२ राष्ट्रकुल स्पर्धेत ज्युदोमध्ये भारताचे हे तिसरे पदक ठरले आहे. अंतिम सामन्यात तुलिकाने चांगली सुरुवात केली होती. मात्र, तिला कामगिरीमध्ये सातत्य राखता आले नाही. परिणामी, तिचा पराभव झाला. 

वेटलिफ्टिंगमध्ये गुरदीप सिंगने कांस्य पदक पटकावलं. १०९ किलोहून अधिक वजनी गटामध्ये गुरदीपने एकूण ३९० किलो वजन उचलत पदकावर नाव कोरलं.

याव्यतिरिक्त भारताच्या सौरभ घोषालने स्क्वॉशमध्ये ११-६, ११-१, ११-४ च्या सरळ सेटमध्ये इंग्लंडच्या जेम्स विलस्ट्रोपचा पराभव करत कांस्य पदकावर नाव कोरलं.