रोहित शर्मावर असभ्य टिप्पणी, काँग्रेसची पक्षप्रवक्त्या शमा मोहम्मद यांना ताकीद; क्रीडामंत्र्यांकडूनही टीका

‘‘रोहित शर्मा हा खेळाडू म्हणून जाड आहे. त्याने वजन कमी करण्याची गरज आहे! तो आतापर्यंतचा सर्वात प्रभावहीन कर्णधार आहे!’’ असे मोहम्मद यांनी रविवारी रात्री ‘एक्स’वर लिहिले होते. मात्र, रोहित शर्मावरील टिप्पणी ही काँग्रेसची अधिकृत भूमिका नसल्याचा खुलासा पक्षाचे माध्यम व प्रसिद्धी विभागाचे प्रमुख पवन खेरा यांनी केला आणि भविष्यामध्ये खबरदारी घेतली जावी असा इशारा शमा मोहम्मद यांना दिला. दुसरीकडे, भाजपने त्यांच्यावर आणि काँग्रेस पक्षावर टीका केली. महत्त्वाच्या वेळी संघाचे मनोधैर्य खच्ची करण्यासाठी नियोजनपूर्वक ही टिप्पणी करण्यात आली असल्याचा आरोप भाजपचे आयटी सेलचे प्रमुख अमित मालवीय यांनी केला.