Olympics : धोनीच्या टीमकडून नीरजला मोठं बक्षीस, सोबत ‘हे’ गिफ्टही देणार

सीएसकेकडून नीरज चोप्राला एक कोटी रुपये देण्यात येतील. सीएसकेच्या प्रवक्त्याने सांगितले, “आम्हाला एक भारतीय म्हणून नीरज चोप्राचा अभिमान आहे. टोक्यो ऑलिम्पिकमधील त्याच्या यशामुळे लाखो भारतीयांना खेळात येण्यासाठी प्रेरणा मिळेल. यासह ते खेळाची सर्वोच्च पातळी गाठण्याचा प्रयत्न करतील.” नीरज चोप्राच्या सन्मानार्थ फ्रेंचायझीकडून ८७५८ क्रमांकाची विशेष जर्सीही जारी केली जाईल. नीरज चोप्राने टोक्योमध्ये ८७.५८मीटर थ्रोसह सुवर्णपदक जिंकले.

नीरजवर बक्षिसांचा पाऊस

नीरजवर सर्व बाजूंनी बक्षिसांचा पाऊस पडला आहे. त्याला १२ कोटींची रक्कम बक्षीस स्वरुपात मिळणार आहे. हरयाणा सरकारने ६ कोटी देण्याचे म्हटले आहे. याशिवाय पंजाब सरकारकडून २ कोटी, बीसीसीआय आणि सीएसकेकडून प्रत्येकी १ कोटी, मणिपूर सरकारकडून १ कोटी आणि भारत सरकारकडून ७५ लाख दिले जातील.

हेही वाचा – नीरज चोप्राच्या ‘गोल्डन’ कामगिरीवर शेतकरी वडिलांची पहिली प्रतिक्रिया; फुटला भावनांचा बांध

तब्बल १२१ वर्षांची प्रतीक्षा संपली

भालाफेकपटू नीरज चोप्रा हा ट्रॅक अँड फील्ड इव्हेंट प्रकारात ऑलिम्पिकमध्ये सुवर्ण पदक जिंकणारा देशातील पहिला खेळाडू ठरला आहे. ब्रिटिश भारताकडून खेळत असलेल्या नॉर्मन प्रिचर्ड यांनी १९००च्या ऑलिम्पिकमध्ये अ‍ॅथलेटिक्समध्ये दोन पदके जिंकली होती. परंतु ते इंग्रज होते, भारतीय नव्हते. नीरजने भारताची १२१ वर्षांची प्रतीक्षा संपवली आहे. नीरजने भालफेक स्पर्धेच्या अंतिम फेरी पहिल्याच प्रयत्नात ८७.०३ मीटर तर दुसऱ्या प्रयत्नात ८७.५८ मीटरपर्यंत भाला फेकत सुवर्णपदकावर नाव कोरलं.