मला डावलून चेन्नईने धोनीची निवड केली हे दु:ख आजही कायम – दिनेश कार्तिक

चेन्नईच्या संघाने आपल्याऐवजी धोनीची संघात निवड केली हे दिनेश कार्तिकला पहिल्यांदा पचनी पडलं नव्हतं. Cricbuzz संकेतस्थळावर समालोचक हर्षा भोगले यांच्या कार्यक्रमात बोलत असताना दिनेश कार्तिकने आपल्या मनातली भावना बोलून दाखवली. “आयपीएलच्या लिलावात चेन्नईने सर्वात प्रथम धोनीची निवड केल्याचं मला समजलं, धोनीसाठी त्यांनी चांगली रक्कम मोजली होती. तो माझ्यापासून काही अंतरावर बसला होता, पण चेन्नईचा संघ मला निवडणार आहे याबद्दल तो मला एक शब्दही बोलला नाही. माझ्यामते त्याला हे माहिती नसावं, पण त्याक्षणी कोणीतरी माझ्या छातीत सुरी खुपसल्यासारखं झालं होतं.”

यापुढे बोलताना दिनेश म्हणाला, “धोनीनंतर कदाचित ते माझी निवड करतील असं मला वाटत होतं, पण त्यानंतर जवळपास मी १३ वर्ष वाट बघतोय पण चेन्नईचं प्रतिनिधीत्व करण्याची संधी मला मिळाली नाही. पहिल्या हंगामासाठी चेन्नई आपल्यावर बोली लावेल असा मला ठाम विश्वास होता. त्याक्षणी माझा टी-२० क्रिकेटमधला रेकॉर्ड चांगला होता, तामिळनाडूकडून खेळताना मी चांगली कामगिरी केली होती. चेन्नईचा संघ आपल्याला कर्णधारपद देईल की नाही हा प्रश्नही माझ्या मनात त्यावेळी सतत घोळत होता. परंतु तसं काही झालं नाही.” २०१८ साली झालेल्या लिलावात चेन्नईचा संघ कार्तिकवर बोली लावत होता, मात्र कोलकात्याने ३.६ कोटींची रक्कम लावत कार्तिकला आपल्या संघात घेतलं.