Australia vs Pakistan ICC Cricket World Cup 2023 Match Updates: डेव्हिड वॉर्नरने एकदिवसीय विश्वचषक २०२३ मध्ये पाकिस्तानविरुद्ध झंझावाती शतक झळकावले. एवढेच नाही तर त्याचा सलामीचा जोडीदार मिचेल मार्शच्या साथीने विक्रमी २५९ धावांची भागीदारी केली. ऑस्ट्रेलियासाठी विश्वचषक इतिहासातील ही सर्वात मोठी सलामीची भागीदारी ठरली. याआधी शेन वॉटसन आणि ब्रॅड हॅडिन यांनी २०११ मध्ये १८३ धावांची भागीदारी केली होती. त्याचबरोबर वॉर्नरने एकदिवसीय विश्वचषकातील पाचवे शतक झळकावून एक मोठा विक्रम केला आहे. या शतकी खेळीच्या जोरावर त्याने पाच महान खेळाडूंना मागे टाकले. या खेळीत त्याने १२४ चेंडूत १४ चौकार आणि ९ षटकारांसह १६३ धावा केल्या.
सौरव गांगुलीसह पाच दिग्गजांना मागे टाकले –
याआधी वनडे वर्ल्ड कपमध्ये सौरव गांगुली, एबी डिव्हिलियर्स, मार्क वॉ, तिलकरत्ने दिलशान आणि महेला जयवर्धने यांनी प्रत्येकी चार शतके झळकावली होती. वॉर्नरने या स्पर्धेच्या इतिहासातील पाचवे शतक झळकावून या पाच महान खेळाडूंना मागे सोडले. या यादीत रिकी पाँटिंग आणि कुमार संगकारा वॉर्नरच्या बरोबरीने आहेत. रोहित शर्मा पहिल्या तर सचिन तेंडुलकर दुसऱ्या स्थानावर आहे.
एकदिवसीय विश्वचषकात सर्वाधिक शतके ठोकणारे टॉप-५ फलंदाज –
७ – रोहित शर्मा
६ – सचिन तेंडुलकर
५ – रिकी पाँटिंग
५ – कुमार संगकारा
५ – डेव्हिड वॉर्नर</p>
डेव्हिड वॉर्नरने विराट कोहलीच्या विक्रमाशी केली बरोबरी –
डेव्हिड वॉर्नरचे हे पाकिस्तानविरुद्धचे सलग चौथे एकदिवसीय शतक ठरले. संपूर्ण जगात कोणत्याही संघाविरुद्ध सलग चार एकदिवसीय सामन्यांमध्ये शतक ठोकण्याचा विक्रम फक्त विराट कोहलीच्या नावावर आहे. आता डेव्हिड वॉर्नरने कोहलीच्या विक्रमाशी बरोबरी केली आहे. विराटने २०१७ ते २०१८ या कालावधीत वेस्ट इंडिजविरुद्ध ४ शतके झळकावली होती. आता वॉर्नरने २०१७ ते २०२३ या कालावधीत सलग चार एकदिवसीय सामने खेळताना पाकिस्तानविरुद्ध शतक झळकावले आहेत. वॉर्नरच्या वनडे कारकिर्दीतील हे एकूण २१ वे शतक ठरले.
डेव्हिड वॉर्नरची विश्वचषक २०२३ मधील कामगिरी –
या सामन्यापूर्वी डेव्हिड वॉर्नर सध्याच्या विश्वचषकात विशेष काही करू शकला नाही. त्याने भारताविरुद्ध ४१ धावा (५२ चेंडू) केल्या. त्यानंतर दक्षिण आफ्रिकेविरुद्ध १३ धावा आणि श्रीलंकेविरुद्ध ११ धावा करून तो बाद झाला होता. श्रीलंकेविरुद्धच्या सामन्यानंतर त्याने पंचांवरही प्रश्न उपस्थित केले होते. आता त्याने मैदानावर आपला राग आपल्या फलंदाजीत काढला आणि पाकिस्तानविरुद्ध उत्कृष्ट शतक झळकावले.
