“भावा काळजी घे, पुढे विश्वचषक…”, हनिमूनला जाणाऱ्या दीपक चहरसाठी बहिणीचा खट्याळ संदेश!

दीपक चहरची बहीण मालती चहर तिच्या सौंदर्यामुळे चर्चेत असते. पण, यावेळी ती तिच्या एका इन्स्टाग्राम पोस्टमुळे चर्चेत आली आहे. मालतीने तिचा भाऊ दीपकच्या हनीमूनबद्दल एक पोस्ट केली आहे. या पोस्टच्या माध्यमातून तिने दीपकला एक मिश्किल सल्ला दिला आहे. मालतीने आपल्या इन्स्टाग्राम अकाउंटवर दीपक आणि जयासोबतचा एक फोटो पोस्ट केला आहे. त्या फोटोखाली तिने आपल्या भावासाठी खास सल्ला लिहिला आहे. ‘चला आता मुलगी आपली झाली, दोघांनाही वैवाहिक आयुष्यासाठी खूप शुभेच्छा. दीपक चहर हनीमूनमध्ये स्वत:च्या पाठीची काळजी घे कारण पुढे तुला वर्ल्ड कपही खेळायचा आहे,’ अशी पोस्ट मालतीने केली आहे. याच फोटो आणि कॅप्शनसह तिने एक ट्विटही केले आहे. मालतीची ही बेधडक पोस्ट चांगलीच चर्चेचा विषय ठरली आहे.

मालतीचा हा सल्ला वरकरणी मस्करी वाटत असला तरी त्यामागे एक खास कारणही आहे. दुखापतीमुळे दीपक चहर फेब्रुवारीपासून क्रिकेटच्या मैदानापासून दूर आहे. २० फेब्रुवारी रोजी कोलकाता येथे झालेल्या वेस्ट इंडिजविरुद्धच्या टी ट्वेंटी सामन्यात तो जखमी झाला होता. यानंतर तो एनसीएमध्ये गेला होता पण तिथे त्याच्या पाठीला दुखापत झाली. या कारणास्तव तो नुकत्याच पार पडलेल्या आयपीएल स्पर्धेत एकही सामना खेळू शकला नाही.

दीपक चहर आणि जया भारद्वाज या जोडप्याचे नाते बऱ्याच दिवसांपासून चर्चेत होते. आयपीएलच्या १४व्या हंगामादरम्यान दीपकने जयाला जाहीरपणे लग्नाची मागणी घातली होती. तेव्हापासून जगभरातील क्रिकेट चाहते या दोघांच्या लग्नाची वाट बघत होते.