SA20 Dinesh Karthik catch video viral : सध्या दक्षिण आफ्रिकेत एसए२० स्पर्धा खेळली जात आहे. टीम इंडियाचा माजी यष्टीरक्षक फलंदाज दिनेश कार्तिकही या स्पर्धेच्या तिसऱ्या हंगामात खेळत आहे. डीके पार्ल रॉयल्सचे प्रतिनिधित्व करत आहे. स्पर्धेतील नववा सामना एमआय केपटाऊन आणि पार्ल रॉयल्स यांच्यात खेळला गेला. या सामन्यात दिनेश कार्तिकने अप्रतिम फिटनेस दाखवला वयाच्या ३९ व्या वर्षी यष्टीच्या मागे एक अप्रतिम झेल घेतला. या झेलचा व्हिडिओ सोशल मीडियावर तुफान व्हायरल होत आहे.
दिनेश कार्तिकने घेतला अप्रतिम झेल –
वास्तविक, दयान गालीम एमआय केपटाऊनच्या डावातील पाचवे षटक टाकत होता. अफगाणिस्तानचा अजमतुल्ला ओमरझाई त्याच्या षटकाच्या पहिल्या चेंडूवर स्ट्राइकवर होता. ओमरझाईला गालीमचा शॉर्ट बॉल फ्लिक करायचा होता. पण त्याला योग्य टायमिंग साधता आलं नाही आणि बॅटचा फेस लवकर बंद झाला. ज्यामुळे चेंडू बॅटच्या कडेला स्पर्श करुन मागे गेला. यावेळी यष्टीच्या मागे असलेल्या दिनेश कार्तिकने चपळाई दाखवली. त्याने उजव्या बाजून डायव्हिंग करत एका हाताने अप्रतिम झेल घेतला. ज्यामुळे अजमतुल्ला उमरझाईला ११ चेंडूत १३ धावा करुन माघारी जावं लागलं.
तत्पूर्वी या सामन्यात पारल रॉयल्सचा कर्णधार डेव्हिड मिलरने नाणेफेक जिंकून एमआय केपटाऊनला प्रथम फलंदाजी करण्यास आमंत्रित केले होते. केपटाऊनला फलंदाजीत फारसा प्रभाव पाडता आला नाही आणि त्यांनी २० षटकात ४ बाद १५८ धावाच करता आल्या. त्यांच्याकडून रॅसी व्हॅन डर ड्युसेनने सर्वाधिक ९१ धावा केल्या. पारल रॉयल्सचा सर्वात यशस्वी गोलंदाज मुजीब उर रहमान ठरला, ज्याने २७ धावांत २ विकेट्स घेतल्या.
पारल रॉयल्सच्या संघाने मारली बाजी –
यानंतर पार्ल रॉयल्सने १५९ धावांचे लक्ष्य १९ षटकांत ६ गडी राखून पूर्ण केले. रॉयल्सकडून लुआन ड्रे प्रिटोरियसने सर्वाधिक ८३ धावांची खेळी केली. याशिवाय कर्णधार मिलर २४ धावा करून नाबाद राहिला. दिनेश कार्तिकनेही फलंदाजीत १० धावांचे योगदान दिले. केपटाऊनकडून ट्रेंट बोल्ट आणि राशिद खान यांनी प्रत्येकी एक विकेट्स घेतली.
© IE Online Media Services (P) Ltd