‘…तर मला धोनीच्या डोक्यातील विचार वाचायला आवडतील’, भारतीय फलंदाजाने व्यक्त केली इच्छा

भारतीय क्रिकेट नियामक मंडळाने (बीसीसीआय) आपल्या अधिकृत ट्विटर हँडलवर एक व्हिडिओ शेअर केला आहे. ज्यामध्ये दिनेश कार्तिकला त्याच्या आवडीनिवडींबद्दल प्रश्न विचारण्यात आले. जर त्याच्याकडे एखाद्या व्यक्तीचे मन वाचण्याची क्षमता असेल तर तो कोणाचे मन वाचेल? या प्रश्नाच्या उत्तरात कार्तिक म्हणाला, “जर माझ्याकडे एखाद्या व्यक्तीचे मन वाचण्याची क्षमता असेल तर मी नक्कीच एमएस धोनीचे मन वाचेन.” भारताचा माजी कर्णधार असलेला एमएस धोनी त्याच्या तल्लख बुद्धीसाठी आणि उत्कृष्ट रणनीतीसाठी ओळखला जातो. धोनीच्या मनात काय सुरू आहे, याचा अंदाज लावणे सर्वात कठीण काम आहे, असे म्हटले जाते.

हेही वाचा – SL vs AUS T20 Series : श्रीलंकेने पाडला धावांचा पाऊस! शेवटच्या तीन षटकांत ठोकल्या ५९ धावा

या प्रश्नोत्तराच्या खेळादरम्यान कार्तिकला इतरही अनेक प्रश्न विचारण्यात आले. तुला संघासोबत रात्री जेवण करायला आवडेल की सिनेमा बघायला आवडेल? या प्रश्नावर त्याने जेवणाची निवड केली. चहा किंवा कॉफीपैकी काय आवडेल? या प्रश्नामध्ये त्याने चहाची निवड केली. त्यानंतर, कार्तिकला जेव्हा डान्सशी संबंधित प्रश्न विचारण्यात आला तेव्हा त्या प्रश्नाचे उत्तर फार कठीण असल्याचे सांगितले. समुद्र किनारा आणि पर्वतीय प्रदेशांपैकी एकाची निवड करण्यास सांगितल्यानंतर त्याने पर्वतांची निवड केली. अशा ठिकाणी जाऊन आपल्याला शांती मिळते, असे तो म्हणाला.