England vs Afghanistan, World Cup 2023: राजधानी दिल्लीत आज अफगाणिस्तानने इंग्लंडविरुद्ध ऐतिहासिक विजयाची नोंद केली. इंग्लंड आणि अफगाणिस्तान यांच्यातील दोलायमान होत असलेल्या सामन्यात माजी विश्वविजेत्यांना चारीमुंड्या चीत करत अफगाणी खेळाडूंनी ६९ धावांनी रोमहर्षक विजय नोंदवला. विश्वचषक २०२३मधील हा पहिला धक्कादायक निकाल आहे. अफगाणिस्तानचा वर्ल्डकप स्पर्धेतला हा केवळ दुसराच विजय आहे. २०१५ वर्ल्डकप स्पर्धेत त्यांनी स्कॉटलंडला नमवलं होतं. इंग्लंडला वर्ल्डकप स्पर्धेत आतापर्यंत बांगलादेश विरुद्ध दोनवेळा आयर्लंड, झिम्बाब्वे आणि आता अफगाणिस्तानविरुद्ध पराभव पत्करावा लागला आहे.
एकदिवसीय विश्वचषकाच्या १३व्या सामन्यात अफगाणिस्तानने इंग्लंडचा ६९ धावांनी पराभव करत अफलातून विजय नोंदवला. इंग्लंडने नाणेफेक जिंकून प्रथम गोलंदाजी करण्याचा निर्णय घेतला. अफगाणिस्तानचा संघ ४९.५ षटकांत सर्वबाद २८४ धावांवर आटोपला. इंग्लंडसमोर विजयासाठी २८५ धावांचे लक्ष्य होते, परंतु त्यांचा संपूर्ण संघ ४०.३ षटकांत २१५ धावांत सर्वबाद झाला.
इंग्लंडचा लाजिरवाणा पराभव
अफगाणिस्तानने १३व्या विश्वचषकात अनपेक्षितपणे इंग्लंडवर विजय मिळवत क्रिकेट विश्वात सर्वांनाच धक्का दिला. त्यांनी दिल्लीतील अरुण जेटली स्टेडियमवर गतविजेत्या इंग्लंडचा पराभव करून मोठा विजय संपादन केला. अफगाणिस्तान संघाने हा सामना ६९ धावांनी जिंकला. २०१५च्या विश्वचषकानंतर स्पर्धेतील त्यांचा हा पहिलाच विजय आहे. त्याचबरोबर इंग्लंडला १२ वर्षात दुसऱ्यांदा भारतीय भूमीवर दुसरा मोठा झटका बसला आहे. २०११च्या विश्वचषकात आयर्लंडने बंगळुरूमध्ये त्यांचा आश्चर्यकारक पराभव करून एकच खळबळ निर्माण केली होती. अफगाणिस्तानने विश्वचषक स्पर्धेत प्रथमच कसोटी खेळणाऱ्या देशाचा पराभव केला आहे. यापूर्वी त्याने २०१५ मध्ये स्कॉटलंडचा पराभव केला होता.
इंग्लंडने नाणेफेक जिंकून प्रथम गोलंदाजी करण्याचा निर्णय घेतला. अफगाणिस्तानचा संघ ४९.५ षटकांत सर्वबाद २८४ धावांवर आटोपला. इंग्लंडसमोर विजयासाठी २८५ धावांचे लक्ष्य होते, परंतु त्यांचा संपूर्ण संघ ४०.३ षटकांत २१५ धावांत सर्वबाद झाला.
फिरकीपटूंसमोर इंग्लिश फलंदाज पराभूत झाले
अफगाणिस्तानच्या फिरकी गोलंदाजांनी चमकदार कामगिरी केली. अनुभवी राशिद खान आणि मुजीब उर रहमान यांनी प्रत्येकी तीन विकेट्स घेतल्या. त्याचवेळी ऑफस्पिनर मोहम्मद नबीने दोन विकेट्स आपल्या नावावर केल्या. राशिद, मुजीब आणि नबी यांनी मिळून इंग्लंडचे कंबरडे मोडले. फजलहक फारुकी आणि नवीन-उल-हक यांनी प्रत्येकी एक विकेट घेतली.
राशिदने शेवटची विकेट घेतली
राशिद खानने इंग्लंडच्या डावातील १०वी विकेट घेतली. त्याने ४१व्या षटकाच्या तिसऱ्या चेंडूवर मार्क वुडला क्लीन बोल्ड केले. वुडने २२ चेंडूत १८ धावा केल्या. रीस टॉपली १५ धावा करून नाबाद राहिला.
हॅरी ब्रूकशिवाय एकही फलंदाज अफगाणी फिरकीपटूंसमोर टिकू शकला नाही
इंग्लंडकडून हॅरी ब्रूकने सर्वाधिक ६६ धावा केल्या. तो वगळता एकाही फलंदाजाला मोठी खेळी खेळता आली नाही. डेव्हिड मलानने ३२, आदिल राशिदने २०, मार्क वुडने १८, रीस टॉपलीने नाबाद १५ आणि जो रूटने ११ धावा केल्या. लियाम लिव्हिंगस्टोन आणि सॅम करन यांनी प्रत्येकी १० धावा केल्या. कर्णधार जोस बटलर आणि ख्रिस वोक्स यांनी प्रत्येकी ९ धावा केल्या. सलामीवीर जॉनी बेअरस्टो २ धावा करून बाद झाला.
