Stuart Broad reacts to consecutive sixes hit by Yuvraj Singh: ऑस्ट्रेलिया आणि इंग्लंड यांच्यातील पाच कसोटी सामन्यांच्या ॲशेस मालिकेतील शेवटचा सामना लंडनमध्ये खेळला जात आहे. इंग्लंडचा वेगवान गोलंदाज स्टुअर्ट ब्रॉडचा हा शेवटचा आंतरराष्ट्रीय सामना आहे. कारण त्याने तिसऱ्या दिवसाचा खेळ संपल्यानंतर निवृत्ती जाहीर केली. आता स्टुअर्ट ब्रॉडने त्याच्या करिअर आणि रेकॉर्डवर अनेक गोष्टी सांगितल्या आहेत. तसेच, त्याने सांगितले की, २००७ च्या टी-२० विश्वचषक स्पर्धेत जेव्हा युवराज सिंगने सलग ६ चेंडूत ६ षटकार मारले होते, या गोष्टीचा त्याच्या कारकिर्दीवर काय परिणाम झाला?
१९ सप्टेंबर २००७ रोजी, किंग्समीड येथे, युवराज सिंगने स्फोटक फलंदाजी करताना, स्टुअर्ट ब्रॉडच्या एका षटकात सलग ६ षटकार ठोकले आणि केवळ १२ चेंडूत अर्धशतक पूर्ण केले होते. स्टुअर्ट ब्रॉड आजपर्यंत तो दिवस कदाचितच विसरला असेल. अलीकडेच पत्रकार परिषदेत त्यांनी या दिवसाची आठवण करून दिली आणि हा दिवस त्यांच्यासाठी सर्वात कठीण असल्याचे सांगितले.
अनुभवी इंग्लिश वेगवान गोलंदाज म्हणाला, “तो खरोखर कठीण दिवस होता. मी कदाचित २१ किंवा २२ वर्षांचा असेन. मात्र, तेव्हा मी दबाव हाताळायला शिकलो नव्हतो. त्यावेळी मला आंतरराष्ट्रीय क्रिकेटचा अनुभव फारच कमी होता. मात्र, तेव्हापासून मी खूप मेहनत केली आणि स्वत:ला योद्धा बनवायला सुरुवात केली.”
खेळाडूच्या आयुष्यात चढ-उतार येत राहतात – स्टुअर्ट ब्रॉड
स्टुअर्ट ब्रॉड पुढे म्हणाला, “कोणत्याही खेळाडूला चढ-उतारांचा सामना नक्कीच करावा लागतो. आम्ही बेन स्टोक्सची कारकीर्दही खूप जवळून पाहिली आहे. प्रत्येकाला या गोष्टीला सामोरे जावे लागते, हे आपल्या सर्वांना माहित आहे.”
स्टुअर्ट ब्रॉडची कारकीर्द कशी राहीली?
कसोटी सामन्यांव्यतिरिक्त स्टुअर्ट ब्रॉडने इंग्लंडकडून एकदिवसीय आणि टी-२० सामने खेळले आहेत. मात्र, स्टुअर्ट ब्रॉड कसोटी क्रिकेटपटू म्हणून खूप यशस्वी ठरला. याशिवाय एकदिवसीय आणि टी-२० फॉरमॅटमध्येही त्याने आपली छाप सोडली. स्टुअर्ट ब्रॉडने १६७ कसोटी सामन्यांमध्ये २७.६७ च्या सरासरीने आणि ५५.७७ च्या स्ट्राइक रेटने ६०२ विकेट्स घेतल्या आहे. तसेच स्टुअर्ट ब्रॉडने १२१ एकदिवसीय सामन्यांमध्ये १७८ विकेट्स घेतल्या आहेत. याशिवाय स्टुअर्ट ब्रॉडच्या नावावर ५६ टी-२० सामन्यात ६५ विकेट्स आहेत.
