Haris Rauf rescued fan from security guard : बांगलादेशविरुद्धच्या कसोटी मालिकेत पाकिस्तानला घरच्या मैदानावर लाजिरवाण्या पराभवाला सामोर लागले. यामुळे क्रिकेट विश्वात पाकिस्तान क्रिकेटची चांगली फजिती झाली होती. या मालिकेत शान मसूद-बाबर आझमसारखे खेळाडू धावा करण्यात पूर्णपणे अपयशी ठरले होते, ज्यामुळे त्यांच्यावर बरीच टीका झाली होती. आता सोशल मीडियावर एक व्हिडीओ व्हायरल झाला आहे, ज्यामध्ये एक लहान चाहता सुरक्षेचा घेरा तोडून बाबर आझमला भेटण्यासाठी मैदानात उतरतो. त्यानंतर हारिस रौफने त्या चाहत्याला सुरक्षा रक्षकापासून वाचवून सर्वांची मनं जिंकली.
बाबर आझमच्या चाहत्याला हारिस रौफने वाचवले –
व्हायरल झालेल्या व्हिडीओमध्ये असे दिसून येते की, संघाच्या सरावाच्या वेळी एक लहान मुलगा सुरक्षा रक्षकांचा घेरा तोडून मैदानात प्रवेश करतो. त्या मुलाने मैदानात प्रवेश करताच सुरक्षा रक्षक त्याला पकडण्यासाठी त्याच्या मागे धावतो. दरम्यान, हारिस रौफ त्या मुलाकडे येतो आणि त्याला सुरक्षा रक्षकापासून वाचवतो. यानंतर त्या लहान चाहत्याला पुन्हा स्टँडवर सोडतो. यावेळी एक सुरक्षा रक्षक हारिस रौफकडे येतो, पण हारिस चाहत्याला सुरक्षा रक्षकाच्या हवाली करत नाही.
चाहत्यांनी स्टेडियमध्ये ‘हारिस-हारिस’च्या घोषणा दिल्या –
पाकिस्तानच्या वेगवान गोलंदाजाची ही कृती पाहून स्टेडियममधील उपस्थित चाहते ‘हारिस-हारिस’च्या घोषणा देण्यास सुरुवात करतात. या दरम्यान तो लहान चाहता स्टँडमध्ये जातो. या घटनेचा व्हिडीओ सोशल मीडियावर तुफान व्हायरल झाला आहे. त्याचबरोबर चाहते वेगवान गोलंदाज हारिस रौफचे कौतुक करत आहेत. बाबर आझमबद्दल बोलायचे तर सध्या त्याच्या कर्णधारपदावर टांगती तलवार दिसत आहे. तो पाकिस्तान संघाच्या मर्यादीत षटकाच्या क्रिकेटमधील संघाचा कर्णधार आहे. पण त्याच्याकडून कर्णधारपद काढून घेतले जाण्याची शक्यता वर्तवली जात आहे.
या व्हिडीओवर चाहत्यांनी जबरदस्त आणि सुंदर प्रतिक्रिया दिल्या. एका यूजरने लिहिले की, “आनंददायक दृश्य.” याशिवाय आणखी एका यूजरने लिहिले की, “तो एक लीजेंड आहे.” दुसऱ्या यूजरने लिहिले, “तो एक क्षण होता.”
हारिस रौफची आतापर्यंतची कारकीर्द –
वेगवान गोलंदाज हारिस रौफ मुख्यतः पाकिस्तानसाठी मर्यादीत षटकातील क्रिकेट खेळतो. त्याने आतापर्यंत १ कसोटी, ३७ एकदिवसीय आणि ७२ टी-२० आंतरराष्ट्रीय सामने खेळले आहेत. या कसोटीत त्याने १ विकेट्स घेतली आहे. याशिवाय त्याने एकदिवसीय सामन्यात ६९ आणि टी-२० आंतरराष्ट्रीय सामन्यात १०२ विकेट्स घेतल्या आहेत.
© IE Online Media Services (P) Ltd