जेतेपदावर पुन्हा स्पेनचा झेंडा

एकापेक्षा एक खेळाडू, प्रतिस्पध्र्याचा सखोल अभ्यास आणि सर्वसमावेशक खेळ या वैशिष्टय़ांच्या जोरावर गतविजेता स्पेनचा संघ यंदाही विश्वचषक जिंकेल, असा अंदाज फुटबॉल अभ्यासकांनी वर्तवला आहे. स्वित्र्झलडस्थित सीआयईएस फुटबॉल अभ्यास संस्थेने विश्वचषकात सहभागी होणाऱ्या ३२ संघांचा तपशीलवार अभ्यास केला. या अभ्यासानुसार विश्वचषक जेतेपदासाठी स्पेनलाच पसंती देण्यात आली आहे. अंतिम लढतीत स्पेन ब्राझीलवर मात करेल. अर्जेटिना तिसऱ्या स्थानी तर फ्रान्सचा संघ चौथ्या स्थानी असेल असे या अभ्यासकांचे म्हणणे आहे. या अभ्यासकांनी अर्थमितीय संकल्पनांच्या आधारे खेळाडूंच्या कामगिरीचे विश्लेषण केले आहे.
विश्वचषकाच्या साखळी फेरीचे सामने, प्रत्येक खेळाडूने कारकिर्दीत आतापर्यंत केलेले गोल, विशेषत्वाने गेल्या दोन वर्षांत केलेल्या गोलांची संख्या, २०१२पासून किती सामन्यांत देशाचे प्रतिनिधित्व केले आहे तसेच विश्वचषकाच्या किती सामन्यांत खेळाडू सहभागी झाला आहे, या निकषांवर हा अभ्यास आधारलेला आहे. या त्रराशिकांनुसार ३२ विविध संघांच्या सर्व खेळाडूंना अभ्यासण्यात आले आणि त्यानुसार स्पेनच जेतेपदाचा दावेदार असल्याचे त्यांनी स्पष्ट केले आहे. बाद फेरीच्या लढतीत ब्राझील बलाढय़ नेदरलँड्सवर मात करेल, असा होरा वर्तवण्यात आला आहे. इटली जपानचे आव्हान संपुष्टात आणेल तर फ्रान्स नायजेरियावर मात करेल व पोर्तुगाल रशियावर विजय मिळवेल, असा अंदाज या संस्थेने मांडला आहे.
अंतिम १६मध्ये स्पेन क्रोएशियाला नमवण्याची शक्यता आहे तर वेन रुनीचा इंग्लंड कोलंबियाला गाशा गुंडाळायला लावेल, तर लिओनेल मेस्सीचा अर्जेटिना संघ इक्वेडोरला मायदेशात पाठवेल व बलाढय़ जर्मनी बेल्जियमचे आव्हान संपुष्टात आणेल, असा या अभ्यासकांचा दावा आहे. या समीकरणांमुळे उपांत्यपूर्व फेरीत ब्राझील इटलीवर मात करेल व फ्रान्स पोर्तुगालला पराभवाचा धक्का देईल. गतविजेता स्पेन इंग्लंडला नमवेल तर अर्जेटिना मातब्बर जर्मनीला घरचा रस्ता दाखवण्याची शक्यता आहे. उपांत्य फेरीत ब्राझील फ्रान्सवर मात करेल तर स्पेन अर्जेटिनावर विजय मिळवेल, असा निष्कर्ष काढण्यात आला आहे.
विजेतेपदासाठी पसंती
१. स्पेन
२. ब्राझील
३. अर्जेटिना
४. फ्रान्स