फुटबॉल विश्वचषक स्पर्धेतील उपांत्यपूर्व फेरीतील शेवटच्या सामन्यामध्ये गतविजेत्या फ्रान्सने इंग्लंडवर २-१ च्या फरकाने विजय मिळवत उपांत्य सामन्यातील स्थान निश्चित केलं आहे. हे दोन्ही बलाढ्य संघ तब्बल ४० वर्षांच्या कालावधीनंतर विश्वचषक फुटबॉल स्पर्धेत आमनेसामने आले होते. या सामन्यामध्ये अगदी ७८ व्या मिनिटाला फ्रान्सने केलेला गोल आणि इंग्लंडचा कर्णधार हॅरी केनने ऐनवेळी चुकवलेली पेनल्टीच्या (Harry Kane miss penalty) संधीमुळे इंग्लंडचा स्पर्धेतून गाशा कुंडाळावा लागला.
सामन्यातील १८ व्या मिनिटालाच ऑरेलियन टिचोयुमेनीने फ्रान्सला १-० ची आघाडी मिळवून दिली. त्यानंतर पहिल्या हाफमध्ये दोन्ही संघांना गोल करता आला नाही. सामन्याच्या दुसऱ्या हाफमध्ये अगदी नवव्या मिनिटाला इंग्लंडने १-१ ची बरोबरी केली. कर्णधार हॅरी केनने पेनल्टीचं रुपांतर गोलमध्ये करत संघाचं आव्हान कायम ठेवलं. मात्र ७८ व्या मिनिटाला पुन्हा फ्रान्सने आघाडी घेतली आणि हीच आघाडी निर्णायक ठरली. ऑलिव्हिएर जिरूडने फ्रान्सकडून दुसऱ्या गोल केला.
सामना संपण्यासाठी काही मिनिटं शिल्लक असताना इंग्लंडला पेनल्टी मिळाली. मात्र कर्णधार हॅरी केनला या पेनल्टलीचं रुपांतर गोलमध्ये करता आलं नाही. केनकडून गोल करण्याची ही हुकलेली संधी सामन्यानंतरही समाजमाध्यमांवरही चांगलीच चर्चेत राहीली. अल बाएत स्टेडियमवर झालेल्या या सामन्यामध्ये उपांत्य फेरीमध्ये प्रवेश करणारा चौथा आणि शेवटचा संघ फ्रान्स असेल हे निश्चित झालं.
नक्की वाचा >> नेयमार मैदानात कधीच दिसणार नाही? FIFA World Cup मधून ब्राझील अनपेक्षितरित्या बाहेर पडल्यानंतर म्हणाला, “हा शेवट आहे असं…”
उपांत्यपूर्व फेरीच्या लढतीत मोरोक्कोने पोर्तुगालला १-० असा पराभवाचा धक्का देत उपांत्य फेरीत प्रवेश केला. यापूर्वीच शूटआऊटमध्ये नेदरलँड्सला नमवत अर्जेंटिनाने उपांत्य फेरीत आपलं स्थान निश्चित केलं आहे. तसेच गतउपविजेत्या क्रोएशियाकडून पेनल्टी शूटउटमध्ये पराभव पत्करावा लागल्याने ब्राझीलचे विश्वचषक फुटबॉल स्पर्धेतील आव्हान संपुष्टात आले असून क्रोएशियाने उपांत्य फेरीत प्रवेश केला.
उपांत्य फेरीमध्ये अर्जेंटिना विरुद्ध क्रोएशिया आणि फ्रान्स विरुद्ध मोरक्को असे सामने रंगणार असून या दोन्ही सामन्यामधील विजेता संघ १८ तारखेला अंतिम सामन्यात जेतेपदासाठी आमने-सामने असतील.