Michael Vaughan racism charge: इंग्लंड संघाचा माजी कर्णधार मायकल वॉनवरील वर्णद्वेषाचे आरोप फेटाळण्यात आले आहेत. शिस्तपालन समितीने त्याच्यावरील वर्णद्वेषाचे आरोप फेटाळून लावले आहेत. २००९ मध्ये यॉर्कशायर संघात समाविष्ट असलेल्या आशियाई वंशाच्या खेळाडूंच्या गटावर वांशिक टिप्पणी केल्याचा आरोप या दिग्गजावर करण्यात आला होता. या प्रकरणात वॉनला १२ वर्षांनंतर दिलासा मिळाला आहे.
मायकल वॉनने दिली माहिती –
मायकेल वॉनने आज, (३१ मार्च २०२३ रोजी) स्वतः ट्विट करुन माहिती देताना सांगितले की, ‘इंग्लंड क्रिकेट बोर्डाच्या शिस्तपालन आयोगाने त्याला वर्णद्वेषी आणि भेदभावपूर्ण भाषा वापरल्याच्या आरोपातून निर्दोष मुक्त केले आहे.’ या प्रकरणाची लंडनमध्ये सुनावणी तीन सदस्यीय समितीसोबत झाली. पॅनेलने आपला निकाल जाहीर करताना वॉनची निर्दोष मुक्तता केली आहे.
या खेळाडूंनी मायकेल वॉनवर आरोप केले होते –
खरं तर, २००९ मध्ये अझीम रफिकने मायकल वॉनवर वर्णद्वेषाचा आरोप केला होता, तेव्हा मायकल वॉन यॉर्कशायरकडून क्रिकेट खेळत होता. अझीमशिवाय आदिल रशीद, राणा नावेद-उल-हसन आणि अजमल शहजाद यांनीही वॉनवर वर्णद्वेषाचा आरोप केला होता. यापूर्वी इंग्लंडचा माजी कर्णधार वॉनने आपल्यावरील आरोप आणि केलेल्या वादग्रस्त ट्विटबद्दल माफी मागितली होती. वॉनने कबूल केले की, केसच्या सुनावणीदरम्यान ईसीबीचे प्रमुख वकील जेन मुल्काही केसी यांनी जवळपास ९० मिनिटे चौकशी केली, तेव्हा त्याचे ट्विट अस्वीकार्य होते. दरम्यान, वॉनने या ट्विटबद्दल माफी मागितली होती.
संपूर्ण प्रकरण काय होते –
क्रिकेटर अझीम रफिकने मायकेल वॉनवर आरोप केला होता की, इंग्लंडच्या माजी कर्णधाराने टी-२० सामन्यादरम्यान त्याला आणि इतर आशियाई वंशाच्या खेळाडूंना लक्ष्य केले होते. त्याचबरोबर माजी कर्णधार म्हणाला होता की, “तुमच्या लोकांची संख्या खूप वाढली आहे, आम्हाला यावर काहीतरी करण्याची गरज आहे.”
वास्तविक, मायकेल वॉनने १५ ऑक्टोबर २०१० रोजी केलेल्या ट्विटमध्ये लिहिले होते की, ‘लंडनमध्ये फारसे इंग्लिश लोक राहत नाहीत, मला नवीन भाषा शिकण्याची गरज आहे.’ या ट्विटसाठी वॉनची निंदा करण्यात आली होती, ज्याचा संबंध वर्णद्वेषाशी जोडला जात होता.
