IND vs PAK T20 World Cup: टी २० विश्वचषकात भारताने पराभव केल्यानंतर पाकिस्तानी चाहते संतापले आहेत. एकीकडे सोशल मीडियावर भारतीय क्रिकेट संघावर कौतुकाचा वर्षावर होत असताना, पाकिस्तानी चाहते खेळाडूंच्या कामगिरीवर नाराजी व्यक्त करत आहेत. भारताने पराभव करताच पाकिस्तानी चाहत्यांनी टीव्ही फोडत आपला संताप व्यक्त केला. यानंतर भारतीय क्रिकेट संघाचा माजी खेळाडू विरेंद्र सेहवाने उपहासात्मक टिप्पणी करत टीव्हीचा काय दोष? अशी पोस्ट केली आहे.
विरेंद्र सेहवागने पाकिस्तानी चाहत्याचा एक व्हिडीओ पोस्ट केला आहे. यामध्ये पाकिस्तानी चाहता पराभव होताच टीव्ही फोडताना दिसत आहे. “शांत राहा शेजाऱ्यांनो, हा फक्त एक सामना होता. तुम्ही चांगले प्रयत्न केलेत. आमच्याकडे दिवाळी आहे त्यामुळे फटाके फोडत आहेत आणि तुम्ही विनाकारण टीव्ही फोडत आहात. नका रे…टीव्हीचा काय दोष,” अशी पोस्ट सेहवागने केली आहे.
मेलबर्नमध्ये शेवटच्या चेंडूपर्यंत रंगलेल्या सामन्यात भारताने पाकिस्तानचा चार गडी राखून पराभव करत वर्ल्डकपची दमदार सुरूवात केली. विराट कोहलीने ५३ चेंडूत ८२ धावा केल्या. त्याला सामनावीराचा पुरस्कार देण्यात आला.
IND vs PAK T20 World Cup: पाकिस्तानच्या खिशातून विराटनं खेचून आणला विजय; भारताला दिवाळीची मोठी भेट
पाकिस्तानने भारतासमोर १६० धावांचं आव्हान ठेवलं होतं. भारतीय संघाची सुरूवात खराब झाली होती. भारताचे दोन्ही सलामीवीर प्रत्येकी ४ धावा करून माघारी परतले होते. नसीम शाहने केएल राहुल तर हारिस रौफने कर्णधार रोहित शर्माला बाद केलं. रोहित – राहुल बाद झाल्यानंतर आलेल्या सूर्यकुमार यादवने पहिल्याच चेंडूवर चौकार मारत धडाकेबाज सुरूवात केली. मात्र १० चेंडूत १५ धावा केल्यानंतर हारिस रौफने त्याला तंबूत पाठवलं. अक्षर पटेलला बढती देऊन पाचव्या क्रमांकावर पाठवण्यात आलं होतं. मात्र तो केवळ दोन धावा करून बाद झाला. दरम्यान विराट कोहलीने ५३ चेंडूत नाबाद ८२ धावा केल्या. तसंच हार्दिक पंड्याने ४० धावांचे योगदान दिले.
शेवटच्या षटकामधील थरार
भारताला विजयासाठी अखेरच्या षटकात १६ धावांची गरज होती. डावखुरा फिरकीपटू मोहम्मद नवाजने पहिल्या चेंडूवर हार्दिकला (३७ चेंडूंत ४० धावा) बाद केले. हार्दिक आणि कोहलीने ११३ धावांची भागीदारी रचली. त्यानंतरच्या दोन चेंडूंवर मिळून तीन धावाच निघाल्या. मात्र, नवाजचा पुढील चेंडू ‘नो-बॉल’ ठरला. कमरेवरील हा चेंडू कोहलीने सीमारेषेबाहेर पोहोचवला. त्यानंतर नवाजने वाइड चेंडू टाकला. भारताला तीन चेंडूत पाच धावांची गरज असताना नवाजने कोहलीच्या यष्टी उडवल्या. मात्र, चेंडू ‘फ्री-हिट’ असल्याने कोहली बाद झाला नाही, शिवाय चेंडू यष्टीला लागून मागच्या दिशेने गेल्याने भारताला तीन धावा मिळाल्या. पुढील चेंडूवर दिनेश कार्तिक बाद झाला. मात्र, त्यानंतर वाइड चेंडू आणि मग अश्विनने एक धाव काढून भारताचा विजय सुनिश्चित केला.
