आपल्या आंतराष्ट्रीय कारकिर्दीत गौतम गंभीरने अनेक गोलंदाजांना सळो की पळो करुन सोडलं होतं. कसोटी क्रिकेट असो किंवा वन-डे, गौतम गंभीरला कोणत्या टप्प्यात गोलंदाजी करायची हा अनेकांना प्रश्न पडायचा. मात्र या प्रश्नाचं उत्तर गौतम गंभीरची लाडकी मुलगी आझीनने दिलं आहे. आपल्या मुलीच्या शाळेत गेलेल्या गौतम गंभीरला, उपस्थित शिक्षकांनी क्रिकेट खेळण्याची विनंती केली. या विनंतीला मान देत गौतमने हातात बॅट घेतली. यावेळी आपल्या बाबांना फलंदाजी करताना पाहून आझीनने चेंडु हातात घेऊन आपल्या बाबांना गोलंदाजी केली. बाप-लेकीच्या नात्यातला हा सुंदर क्षण गौतमने आपल्या ट्वीटर अकाऊंटवरुन शेअर केला आहे.

गौतमच्या या व्हिडीओवर कोलकाता नाईट रायडर्सचा मालक आणि बॉलिवूडचा किंग खान शाहरुखने, तुझ्या मुलीला कोलकाता नाईट रायडर्सच्या सराव शिबीरात गोलंदाजी करण्यासाठी घेऊन ये; अशा आशयाचा प्रेमळ संदेश दिला आहे.

गौतम गंभीर सध्या रणजी करंडकात दिल्लीच्या संघाकडून खेळतो आहे. या स्पर्धेत आतापर्यंत गौतमने चांगल्या धावा काढल्या आहेत. नुकत्याच उत्तर प्रदेशविरुद्ध झालेल्या सामन्यात गौतमने ८६ धावांची खेळी केली.