MS Dhoni Bikes : असं म्हणतात, ‘प्रेमात असलेला माणूस आवडत्या व्यक्तीसाठी काहीही करू शकतो. मग ते रात्री चोरून भेटणं असो किंवा मग शाहजानसारखं ताजमहालाची निर्मिती करणं असो.’ प्रेमापोटी जगावेगळ्या गोष्टी करणाऱ्या लोकांची अनेक उदाहरणं आपण बघितली असतील. भारतीय क्रिकेटमध्ये देखील असाच एक प्रेमवेडा आहे. या प्रेमवेड्याचं नाव आहे, महेंद्रसिंह धोनी! भारतीय संघाचा माजी कर्णधार असलेला धोनी कुण्या व्यक्तीच्या नाहीतर मोटारसायकलच्या प्रचंड प्रेमात आहे. त्याने आपल्या मोटारसायकलींसाठी एक आलिशान गॅरेजही बांधलेलं आहे.
महेंद्रसिंह धोनीचे मोटारसायकल प्रेम वेळोवेळी उघडपणे दिसलेलं आहे. त्यांच्या खरेदीसाठी त्याने कोट्यवधी रुपये खर्च केले आहेत. त्याच्या गाड्यांच्या ताफ्यामध्ये कॉन्फिडरेट हेलकास्ट एक्स १३२, डुकाटी १०९८, कवासाकी निंजा झेडएक्स१४आर, हार्ले डेव्हिडसन फॅटबॉय, यमाहा वायझेडएफ६०० थंडरकास्ट यांसारख्या आलिशान मोटारसायकल आहेत.
गाड्यांसोबत वेळ घालवण्याची आवड
धोनी मोटारसायकलचा प्रचंड शौकीन आहे. त्याला केवळ गाड्या चालवायलाच नाही तर त्यांची निगा राखणेही प्रचंड आवडते. तो आपल्या आलिशान गॅरेजमध्ये गाड्यांची कशी काळजी घेतो, याची झलक त्याच्या जीवनपटामध्येही दाखवण्यात आलेली आहे. आपल्या सर्व मोटारसायकलसोबत त्याचे भावनिक बंध तयार झालेले आहेत. काही वर्षांपूर्वी त्याने आपली पहिली गाडी असलेली राजदूत स्वतः दुरुस्त केली होती.
स्वत: खरेदी केलेल्या गाड्यांव्यतिरिक्त क्रिकेट सामन्यांमध्ये सामनावीर म्हणून मिळालेल्या सर्व मोटारसायकल त्याने जपून ठेवल्या आहेत. २००६ मध्ये इंग्लंडविरुद्ध सामनावीर म्हणून जिंकलेल्या मोटारसायकलवरून युवराज सिंगसोबत मैदानात चक्कर मारलेला धोनी आजही अनेकांना आठवत असेल. अनेक सेलिब्रिटी तक्रार करतात की, चाहत्यांच्या नजरेत येण्याच्या भीतीमुळे त्यांना आवड असूनही मोटारसायकलवरून फिरता येत नाही. धोनी मात्र, याला अपवाद ठरतो. जेव्हा संधी मिळेल तेव्हा रांची आणि चेन्नईच्या रस्त्यांवरून बिनधास्तपणे मोटारसायकल चालवताना दिसतो.
