हार्दिक पंड्याची पत्नी नताशाने टीम इंडिया भारतात येताच केलेली पोस्ट पाहून घटस्फोटाच्या चर्चांना उधाण; लिहिलं, “तेव्हा माझं रक्षण..”

तुम्हाला माहित असेलच की आज, ४ जुलै हार्दिक पंड्या सुद्धा टीम इंडियाच्या खेळाडूंसह मायदेशी परतला आहे. सर्वात आधी दिल्लीत पंतप्रधान नरेंद्र मोदी यांची भेट घेतल्यावर संपूर्ण टीम इंडिया मुंबईत दाखल होणार आहे. संध्याकाळी मुंबईच्या मरीन ड्राइव्ह वरून ते वानखेडे स्टेडियमपर्यंत विजयी रॅली निघणार आहे. अशातच आज नताशाने रील पोस्ट करून देवाकडे प्रार्थना केली आहे. देवा मी जेव्हा संकटात असते तेव्हा मला त्यातून बाहेर काढ आणि जेव्हा संकटात नसते तेव्हा माझं रक्षण कर अशा आशयाची ही रील आहे. ही प्रार्थना चांगल्यासाठीच केली असली तरी तिचा आता या क्षणी संदर्भ काय असा प्रश्न चाहत्यांना पडत आहे.

अगदी काहीच दिवसांपूर्वी नताशानी बायबलमधील एक वाक्य वाचतानाचा स्वतःचा व्हिडीओ सुद्धा शेअर केला होता. “मी आज एक अशी गोष्ट वाचली की ज्याची मला खरोखरच गरज होती. म्हणूनच हे बायबल मी माझ्याबरोबर कारमध्ये घेऊन आले जेणेकरून मला ते तुम्हाला सगळ्यांना वाचून ऐकवता येईल. तर हे वाक्य असं होतं की. ‘तुमच्याआधी, तुमच्यानंतर व तुमच्या बरोबर देवच कायम असणार आहे. तो तुम्हाला कधीच सोडून जाणार नाही किंवा दूर करणार नाही. म्हणूनच तुम्ही कुठल्याही गोष्टीला घाबरू नका. आपण एखाद्या परिस्थितीत जेव्हा अडकून पडतो तेव्हा आपलं सगळं अवसान गाळून जातं, निराशा जाणवते, दुःख वाटून आपण सगळं काही गमावून बसलोय असं वाटतं, पण तेव्हा सुद्धा देव तुमच्याबरोबरच असतो. तुमच्याबाबत वाईट जरी घडत असलं तरी देवाकडे तुमच्यासाठी चांगलं घडण्याचे प्लॅन्स सुद्धा तयार असतात.”

हे ही वाचा<< रोहित, कोहली, बुमराह, द्रविडने १६ तासांच्या प्रवासात केलं काय? एकत्र प्रवास केलेल्या प्रतिनिधींनी शेअर केलेला खास अनुभव वाचा

नताशाच्या या प्रेरणादायी पण दुःखी पोस्टचा संबंध अनेकजण तिच्या व आणि हार्दिक पांड्याच्या नात्यात आलेल्या कटुतेशी जोडत आहेत. आयपीएलच्या दरम्यान नताशाने आपले लग्नाचे फोटो डिलीट केले होते. यातूनच घटस्फोटाच्या अफवा पसरल्या होत्या. काही दिवसांनी नताशाने ते फोटो रिस्टोअर केले तेव्हा लोकांनी असे कयास बांधले की, कदाचित आयपीएलच्या वेळी होत असलेलं ट्रोलिंग थांबवण्यासाठी व हार्दिकला सहानुभूती मिळवून देण्यासाठी तिने आधी फोटो डिलीट केले असावेत. पण आता पुन्हा टी २० विश्वचषकनंतर पुन्हा या चर्चांनी जोर धरला आहे. या जोडप्याने अद्याप याबाबत कोणतेही अधिकृत विधान जारी केलेले नाही.