IND vs PAK Match Sportsmanship: एका सामन्यात दोन दृश्य; हरिस रौफने केले गैरवर्तन, तर शादाब खानने जिंकली मनं

प्रथम हरिस रौफबद्दल बोलूया, हरिस आणि शाहीनने सुरुवातीच्या विकेट्स घेत भारताच्या आघाडीच्या फळीचे कंबरडे मोडले. भारतीय संघ २०० धावांच्या आत गुंडाळला जाईल असे वाटत होते, परंतु इशान किशन आणि हार्दिक पांड्या यांनी संघाचा डाव सावरला. या दोघांनी पाचव्या विकेटसाठी १३६ धावांची महत्त्वपूर्ण भागीदारी रचली. यानंतर हरिसने इशान किशनला बाद करत ही जोडी फोडली. त्यानंतर इशान किशनने एकच जल्लोष केला. त्याचबरोबर इशान तंबूत परतत असताना हातवारे करुन त्याला डिवचण्याचा प्रयत्न केला.

इशान किशन ३८व्या षटकात बाद झाला. तो ८१ चेंडूत ९ चौकार-२ षटकार ठोकत ८२ धावा करुन झेलबाद झाला. त्याने हा चेंडू खेचण्याचा प्रयत्न केला, पण बॅटच्या वरच्या काठावर आदळला आणि बाबर आझमने त्याचा झेल घेतला. यानंतर हरिसने आपला राग काढला. त्याने उद्धटपणे इशानला हातवारे करुन बाहेर जायला सांगितले.

हेही वाचा – राहुल-किशनबद्दल बोलताना मोहम्मद कैफच्या वक्तव्यावर गौतम गंभीर संतापला; म्हणाला, ‘वर्ल्ड कप जिंकण्यासाठी नाव महत्त्वाचे की…’

आता शादाब खानबद्दल बोलूया, इशान आणि हार्दिक फलंदाजी करत असताना धावताना हार्दिकच्या बुटाच्या लेस सैल झाल्या. हार्दिक स्वतः काही करू शकण्याआधीच शादाब आला आणि त्याच्या लेसेस बांधायला लागला. शादाबच्या या वर्तनाने क्रिकेटप्रेमींची मने जिंकली. यानंतर ट्विटरवर ‘खेळ भावना’ सतत ट्रेंड करू लागली. मात्र, एका सामन्यात दोन वेगवेगळी दृश्ये पाहून चाहते एकीकडे शादाब खानचे कौतुक करत असताना दुसरीकडे हरिस रौफला टीकेला सामोरे जावे लागत आहे.