Harbhajan Singh said Rohit Sharma is a better captain than MS Dhoni : महेंद्रसिंग धोनी हा भारतीय क्रिकेटमधील सर्वात यशस्वी कर्णधार आहे. त्याने आपल्या नेतृत्त्वाखाली भारताला एक-दोन नव्हे तर तीन आयसीसी ट्रॉफी जिंकून दिल्या आहेत. इतर कोणत्याही भारतीयाच्या नेतृत्वाखाली टीम इंडियाला दोनही आयसीसी ट्रॉफी जिंकण्यात यश आलेले नाही. असे असतानाही हरभजन सिंगला धोनीपेक्षा रोहितची नेतृत्त्व शैली आवडते. याबाबतचे कारण स्वत: हरभजन सिंगने सांगितले. तो म्हणाला, रोहित शर्मा हा खेळाडूंचा कर्णधार आहे.
रोहित हा खेळाडूंचा कर्णधार –
‘स्पोर्ट्स यारी’वर बोलताना हरभजन सिंगने सांगितले की त्याने महेंद्रसिंग धोनीऐवजी रोहित शर्माची नेतृत्त्व करण्याची शैली आवडते. तो म्हणाला, मी धोनीपेक्षा रोहितच्या नावाला पसंती दिली. कारण रोहित हा खेळाडूंचा कर्णधार आहे. तो स्वत: खेळाडूंकडे जातो आणि त्यांना काय पाहिजे ते विचारतो. ज्यामुळे त्याचे सहकारी त्याच्याशी चांगल्या प्रकारे जोडले जातात. पण धोनीची शैली वेगळी होती.
धोनी आणि रोहित हे पूर्णपणे वेगळे कर्णधार –
हरभजन सिंग पुढे म्हणाला, “तो (धोनी) कोणाशीही बोलत नव्हता. मौनातून तो आपले विचार मांडत असत. ही त्याची इतरांशी बोलण्याची पद्धत होती. धोनी आणि रोहित हे पूर्णपणे वेगळे कर्णधार आहेत. एमएस धोनी कधीही कोणत्याही खेळाडूकडे जात नाही आणि त्याला कसे क्षेत्ररक्षण हवे आहे, हे विचारत नाही. तो तुम्हाला तुमच्या चुकांमधून शिकू देईल.”
‘धोनीने जे केले ते रोहितनेही केले’ –
महेंद्रसिंग धोनीला क्रिकेट जगतातील सर्वोत्तम कर्णधारांपैकी एक मानले जाते. त्याच वेळी, रोहितला अनेकदा खेळाडूंचा कर्णधार म्हणून पाहिले जाते, कारण तो खेळाडूंना स्वातंत्र्य आणि पाठिंबा देतो. विशेषतः तो गोलंदाजासाठी खास कर्णधार आहे. हरभजन म्हणाला, ‘एक चांगला कर्णधार तो असतो, जो तुम्हाला विजयासाठी लढायला भाग पाडतो. माझ्यासाठी धोनीने कर्णधार म्हणून जे काही केले, तेच रोहितनेही केले आहे. त्यामुळे तो कोणापेक्षा कमी नाही.
हरभजन या दोघांच्या नेतृत्वाखाली खेळलाय –
हरभजन सिंग रोहित शर्मा आणि एमएस धोनी या दोघांच्या नेतृत्वाखाली खेळला आहे. तो रोहित शर्माच्या नेतृत्वाखाली आयपीएलमध्ये मुंबई इंडियन्सकडून खेळला. याच लीगमध्ये भज्जी एमएस धोनीच्या नेतृत्वाखाली चेन्नई सुपर किंग्जकडून खेळला होता. रोहित आणि धोनी दोघेही आयपीएलचे सर्वात यशस्वी कर्णधार आहेत. रोहितने मुंबईसाठी आणि धोनीने चेन्नईसाठी ५ वेळा आयपीएलचे विजेतेपद पटकावले आहे.
