AFG Coach Slams ICC After SA Victory: संपूर्ण विश्वचषकात दमदार कामगिरी करूनही अफगाणिस्तानचा संघ आज दक्षिण आफ्रिकेविरुद्ध सामन्यात पराभूत होऊन उपांत्य फेरीतून बाहेर पडला. या पराभवानंतर कर्णधार रशीद खानने परिस्थितीसमोर हतबल झाल्याचे मान्य करत भावूक पोस्ट केली होती. दुसरीकडे, अफगाणिस्तानच्या प्रशिक्षकांना मात्र आजचा पराभव हा ‘अन्यायाचे फळ’ आहे असं वाटतंय. अफगाणिस्तानचे प्रशिक्षक जोनाथन ट्रॉट यांनी टी २० विश्वचषकाच्या उपांत्य फेरीसाठी वापरण्यात आलेल्या खेळपट्टीवर टीका केली आहे. इतक्या मोठ्या व महत्त्वाच्या सामन्यासाठी अशा प्रकारची खेळपट्टी साजेशी नाही, असे म्हणत ट्रॉट यांनी आयसीसीला खडेबोल सुनावले. दक्षिण आफ्रिका विरुद्ध अफगाणिस्तान सामन्याविषयी बोलायचे झाल्यास, ब्रायन लारा क्रिकेट अकादमी स्टेडियमवर झालेल्या या खेळात अफगाणिस्तानचा डाव केवळ ५६ धावांत गुंडाळला गेला. ही टी २० विश्वचषक उपांत्य फेरीतील सर्वात कमी धावसंख्या ठरली.
ट्रॉट यांच्या म्हणण्यानुसार, दक्षिण आफ्रिकेने ८.५ षटकात अफगाणिस्तानने दिलेलं ५७ धावांचं आव्हान पूर्ण केलं असलं तरी या खेळपट्टीवर त्यांना सुद्धा अडचणींचा सामना करावा लागलाच. “पाहायला गेलं तर, ५७ धावांचा पाठलाग करताना त्यांनाही कठीणच गेलं. याचं कारण म्हणजे खेळपट्टीवरुन मिळणारा अतिरिक्त स्विंग आणि चेंडूला मिळणारी अनियमित उसळी यामुळे सेमी फायनलसाठीची खेळपट्ची ही गोलंदाजांना झुकतं माप देणारी होती”, असं अफगाणिस्तानचे प्रशिक्षक जोनाथन ट्रॉट यांनी म्हटलं आहे.
सामन्यानंतरच्या पत्रकार परिषदेत ट्रॉट म्हणाले की, “मला स्वतःला अडचणीत आणायचे नाही किंवा ‘कोल्ह्याला द्राक्ष आंबट’ अशा म्हणीचं उदाहरणही व्हायचं नाही. परंतु विश्वचषकाच्या उपांत्य फेरीसाठी योग्य अशी ही खेळपट्टी नक्कीच नाही. हे माझं साधं सरळ मत आहे.”
इंग्लंडच्या माजी फलंदाजाने ही खेळपट्टी फलंदाजीची लय पूर्णपणे बिघडवणारी होती असेही म्हटले. “ही स्पर्धा सर्वांसाठी न्यायकारक असायला हवी होती. मी असं म्हणणार नाही की खेळपट्टीवर चेंडू स्पिन किंवा सीम होऊ नये, पीच पूर्णपणे सपाट हवी. पण माझं एवढंच म्हणणं आहे की खेळपट्टीवर हालचाल करताना, पुढे जाताना फलंदाजाला भीती नसावी. पायांची हालचाल करताना विश्वास वाटायला हवा, तरच ते शॉट खेळू शकतील, त्यांचं कौशल्य दाखवू शकतील. टी २० मध्ये मुळातच आक्रमक खेळ अपेक्षित आहे. पटापट धावा करणे, विकेट्स घेणे हा या खेळाचा फॉरमॅट आहे, इथे पीचवर टिकूनच राहायचंय हा विचार केला जात नाही.”
हे ही वाचा<< ५६ धावांसह अफगाणिस्तान विश्वचषकातून बाहेर! भावूक होत कर्णधार रशीद खान म्हणाला, “चांगली कामगिरी करता आली असती..”
दरम्यान, न्यूयॉर्कमधील खेळपट्ट्या या गोलंदाजांना झुकतं माप देतात यावरून आधीही बरीच टीका झाली आहे. उल्लेखनीय म्हणजे, या ठिकाणी झालेल्या पाच विश्वचषक सामन्यांपैकी फक्त एकदाच प्रथम फलंदाजी करणाऱ्या संघाला १०० धावांचा टप्पा पार करता आला होता. ही दुर्मिळ कामगिरी करण्याचा रेकॉर्ड वेस्ट इंडिजच्या नावे आहे ज्यांनी न्यूझीलंडविरुद्ध सहा बाद १४९ धावा केल्या होत्या व नंतर सामना सुद्धा जिंकला होता.
