बांगलादेशी क्रिकेटर नुरुल इस्लामने भारताविरुद्धच्या सामन्यादरम्यान विराट कोहलीवर खोट्या क्षेत्ररक्षणाचा आरोप केला होता, त्यानंतर विराट कोहलीचा एक व्हिडिओ सोशल मीडियावर चांगलाच व्हायरल होत आहे. खोट्या क्षेत्ररक्षणासाठी (Fake Fielding) विराट कोहली खरोखरच दोषी होता का आणि भारताला खरोखरच पाच धावांचा दंड ठोठावायला हवा होता का, अशी चर्चा सतत होत आहे. याबाबत ट्विटरवर वाद सुरू झाला असून आता टीम इंडियाचा माजी क्रिकेटर आकाश चोप्राने यावर आपले मत मांडले आहे.
आकाश चोप्राने ट्विटरवर लिहिले, ”क्षेत्ररक्षण खरोखरच खोटे होते का?’ यावर एका ट्विटर युजरने लिहिले की, हो झालं, पण नियमांनुसार पहिल्यांदा क्षेत्ररक्षकाला इशारा दिला जातो आणि दुसऱ्यांदा फक्त विरोधी संघाला पाच धावा मिळतात.”
या ट्विटर यूजरला उत्तर देताना आकाश चोप्राने लिहिले की, ”हे योग्य नाही. हे पंचांवर अवलंबून आहे की ते हे खोटे क्षेत्ररक्षण आहे असे मानतात का? आणि क्षेत्ररक्षण करणाऱ्या संघाला पाच धावांचा दंड ठोठावतात आणि मग तो चेंडू डेड बॉल घोषित केला जातो. प्रथमच असे केल्याने शिक्षा होते, आयसीसीच्या नियमात कुठेही असे लिहिलेले नाही की प्रथम ताकीद दिली जाते आणि त्यानंतरच शिक्षा दिली जाते.”
नेमकं काय झालं?
नुरुल ज्या क्षणाचा उल्लेख करत आहे, तेव्हा सातवं षटक टाकलं जात होतं. अर्शदीपने गोलंदाजाकडे चेंडू फेकलेला असताना विराट कोहलीने आपल्या हातात चेंडू आला असून फेकत असल्याचं खोटं नाटक केलं होतं. यावेळी लिट्टन आणि नजमूल मैदानात होते. त्यांनी यावेळी कोहलीकडे पाहिलंदेखील नव्हतं. त्यामुळे नुरुलच्या आरोपांनंतर अनेक प्रश्न उपस्थित होत आहेत.
आयसीसीचा नियम काय सांगतो?
आयसीसीचा नियम क्षेत्ररक्षण करणाऱ्या संघाला जाणूनबुजून लक्ष विचलित करणं, फसवणूक करणं किंवा फलंदाजाला अडथळा करण्यापासून प्रतिबंधित करतो. जर पंचांना असं झाल्याचं आढळलं तर ते डेड बॉल जाहीर करु शकतात किंवा पाच पेनाल्टी धावा देऊ शकतात.
