“बाबर, आफ्रिदी एकमेकांशी बोलत नाहीत, रिझवानला तर..”, वासिम अक्रमनं सांगितली पाकिस्तान हरण्याची ३ नेमकी कारणं

बुमराहचा खेळ शहाणपणाचा आणि रिझवानला..

१२० धावांच्या क्षुल्लक लक्ष्याचा पाठलाग करताना पाकिस्तानला १४ षटकांनंतर ८० – ३ अशी मजल मारता आली होती पण त्याआधी बुमराहने पाकिस्तानच्या सर्वाधिक धावा करणाऱ्या मोहम्मद रिझवानला ३१ धावांवर बाद केले. रिझवानच्या विकेटबद्दल वासिम अक्रमने इंडिया विरुद्ध पाकिस्तान सामन्याच्यानंतर स्टार स्पोर्ट्सशी बोलताना म्हटले की, “पाकिस्तानचे काही खेळाडू १० वर्षांपासून क्रिकेट खेळत आहेत, त्यांना मी आता शिकवू शकत नाही. पण रिझवानला खेळाबाबत अजिबात जागरूकता नाही. बुमराहला विकेट घेण्यासाठी चेंडू देण्यात आला होता आणि सावधपणे खेळणे हेच शहाणपणाचे ठरले असते हे त्याला माहीत असावे. पण रिझवानने मोठा फटका मारला आणि त्याची विकेट गमावली”.

पाकिस्तानला प्रशिक्षक नाही संघ बदलण्याची गरज..

दुसरीकडे,इफ्तिखार अहमदला लेग साइडला लागलेला एक शॉट माहीत आहे. तो वर्षानुवर्षे संघाचा भाग आहे पण फलंदाजी कशी करावी हे त्याला माहीत नाही. आता इतक्या वर्षांनी मी जाऊन फखर जमानला खेळाबाबत जागरूक कसं राहायचं हे सांगू शकत नाही. पाकिस्तानी खेळाडूंना वाटते की त्यांनी चांगली कामगिरी केली नाही तर प्रशिक्षकांना काढून टाकले जाईल आणि त्यांना काहीही होणार नाही. प्रशिक्षक ठेवण्याची आणि संपूर्ण संघ बदलण्याची हीच वेळ आहे.

बाबर आणि आफ्रिदीला घरी बसवा!

वासिम अक्रमने बाबर आझम आणि शाहीन शाह आफ्रिदी यांच्यातील समीकरणाविषयी सुद्धा थेट भाष्य केलं आहे. “पाकिस्तानच्या कर्णधार पदात बदल झाल्यापासून आफ्रिदी आणि बाबर एकमेकांशी बोलत नाहीत. पण हे आंतरराष्ट्रीय क्रिकेट आहे इथे तुम्हाला देशासाठी खेळायचं असतं ते जमत नसेल तर या खेळाडूंना घरी बसवा”, असे अक्रम म्हणाला.

हे ही वाचा<< मोहम्मद सिराजच्या आक्रमक थ्रोचा रिझवानच्या हाताला फटका, दुखरा हात घेऊन रिझवान उठताच मैदानात काय घडलं पाहा, Video

दरम्यान, भारत विरुद्ध पाकिस्तान सामन्याबाबत सांगायचं तर, पुरुषांच्या T20 विश्वचषकात यशस्वीपणे बचावलेली ही दुसरी-सर्वात कमी धावसंख्या होती. भारताच्या सहा धावांनी मिळवलेल्या विजयाने २०२२ च्या उपविजेत्या पाकिस्तानला गट-स्टेजमधून बाहेर पडण्याच्या उंबरठ्यावर आणले आहे.