IND vs SA Final Highlights : सूर्यकुमार यादवचा झेल ठरला निर्णायक! टीम इंडियाने १७ वर्षानंतर दुसऱ्यांदा टी-२० विश्वचषकावर कोरलं नाव

भारतीय संघ बार्बाडोसला पोहोचला

भारत आणि दक्षिण आफ्रिकेचे संघ अंतिम सामन्यासाठी स्टेडियमवर पोहोचले आहेत. बार्बाडोसमधील हवामान स्वच्छ दिसते. ही चाहत्यांसाठी आनंदाची बाब आहे. अशा स्थितीत नाणेफेक वेळेवर होणे अपेक्षित आहे.

इथे भारताचा वरचष्मा का आहे?

सध्याच्या विश्वचषकात भारतीय संघ बार्बाडोसमध्ये एक सामना खेळला आहे. तो येथे जिंकला होता. त्याचबरोबर या स्पर्धेत बार्बाडोसमध्ये खेळण्याची दक्षिण आफ्रिकेच्या संघाची ही पहिलीच वेळ असेल. अशा परिस्थितीत त्यांना परिस्थितीनुसार स्वत:ला जुळवून घेण्याचे आव्हान असेल. त्याचबरोबर भारताला आपल्या भूतकाळातील अनुभवाचा फायदा मिळू शकतो. टी-२० विश्वचषक सामन्यांबद्दल बोलायचे झाले तर दोन्ही संघ आतापर्यंत सहा वेळा आमनेसामने आले आहेत. यापैकी चार वेळा भारताने बाजी मारली आहे. त्याचबरोबर दक्षिण आफ्रिकेला दोनदा विजय मिळवण्यात यश आले आहे. या बाबतीतही भारताचा वरचष्मा आहे.

दक्षिण आफ्रिका संघाची कमजोरी

हेन्रिच क्लासेनच्या बॅटने अद्याप आयपीएलमध्ये जशी बॅटिंग केली होती, तशी बॅटिंग स्पर्धेत झालेली नाही. क्लासेनने ८ सामन्यात ११२ च्या स्ट्राईक रेटने १३८ धावा केल्या आहेत. कर्णधार मार्करमलाही आतापर्यंत फलंदाजीत छाप पाडता आलेली नाही. त्याला अंतिम फेरीत जबाबदारी स्वीकारावी लागणार आहे. तसेच अनुभवी डेव्हिड मिलरने केवळ एक अर्धशतक झळकावले आहे. सुपर-८ मध्ये त्याने ०, ४३, ४ धावांची इनिंग खेळली होती.

टीम इंडियाची कमजोरी

विराट कोहली सलामीवीर म्हणून न चालणे ही चिंतेची बाब आहे. आतापर्यंत त्याने १०.७१ च्या सरासरीने केवळ ७५ धावा केल्या आहेत. विराट कोहली लवकर बाद झाल्यानंतर ऋषभ पंतने मोठी खेळी साकारलेली नाही. मात्र त्याने सात सामन्यांत १२९ च्या स्ट्राईक रेटने १७१ धावा केल्या आहेत. शिवम दुबेला आतापर्यंत त्याची निवड सार्थ ठरवता आलेली नाही. उपांत्य फेरीतही तो पहिल्याच चेंडूवर बाद झाला होता.

केन्सिंग्टन ओव्हल खेळपट्टी अहवाल

टी-२० विश्वचषक २०२४ मध्ये केन्सिंग्टन ओव्हलवर वेगवान गोलंदाजांनी सर्वाधिक विकेट्स घेतल्या आहेत. २०.२२ च्या सरासरीने आणि ७.८८ च्या इकॉनॉमी रेटने ५९बळी घेतले आहेत. त्याचबरोबर या खेळपट्टीवर २०० च्या वर स्कोअर एकदाच केला गेला आहे. भारतीय संघ येथे एक सामना खेळला आहे. भारताने अफगाणिस्तानविरुद्धच्या सामन्यात १८१ धावा केल्या होत्या. जो सामना भारतानी ४७ धावांनी जिंकला होता. दक्षिण आफ्रिकेच्या संघाने येथे एकही सामना खेळलेला नाही.

बार्बाडोसमध्ये हवामान कसे असेल?

Weather.com नुसार, पावसाचा अंदाज ७०% आहे आणि स्थानिक वेळेनुसार सकाळी १०:३० वाजता (भारतीय वेळेनुसार रात्री ८:००वाजता), सामना सुरू होण्याच्या वेळेस पावसाची ६६% शक्यता आहे. याशिवाय संध्याकाळीही हवामानाचा अंदाज असाच आहे. स्थानिक वेळेनुसार दुपारी ४:०० वाजता (भारतीय वेळेनुसार १:३० वाजता) पावसाची ५०% शक्यता आहे. त्यामुळे, पूर्ण सामना होण्याची शक्यता खूपच कमी दिसते. त्यामुळे सामना रविवारी (२९ जून) राखीव दिवशी सकाळी १०:३० वाजता (स्थानिक वेळेनुसार) सुरू होण्याची शक्यता आहे.

टी-२० क्रिकेटमध्ये भारताचा दक्षिण आफ्रिकेवर वरचष्मा राहिला आहे. या दोघांमध्ये एकूण २६ सामने खेळले गेले आहेत. यापैकी भारताने १४ आणि आफ्रिकेने ११ सामने जिंकले आहेत. त्याचवेळी एक सामना अनिर्णित राहिला. टी-२० विश्वचषकातही भारताचे दक्षिण आफ्रिकेवर वर्चस्व आहे. दोन्ही संघ ६ वेळा आमनेसामने आले आहेत, ज्यात भारताने चार सामने जिंकले आहेत तर दक्षिण आफ्रिकेने दोन सामने जिंकले आहेत.