T20 WC 2024 : ‘या’ स्टार खेळाडूचं विश्वचषक खेळणं कठीण, अमेरिकेने व्हिसा देण्यास दिला नकार, काय आहे प्रकरण?

गेल्या आठवड्यातही अमेरिकेने लामिछानेला या स्पर्धेत सहभागी होण्यासाठी अमेरिकेचा व्हिसा देण्यास नकार दिला होता. नेपाळ क्रिकेट असोसिएशनच्या केंद्रीय समितीचे सदस्य चुंबी लामा यांनी सांगितले की, लामिछानेला अमेरिकेचा व्हिसा मिळवून देण्याचे सर्व प्रयत्न अयशस्वी ठरले आहेत. लामिछाने हा नेपाळ क्रिकेट संघाचा महत्त्वाचा सदस्य आहे, मात्र बलात्काराचे प्रकरण समोर आल्यामुळे त्याला यापूर्वी संघात स्थान देण्यात आले नव्हते.

लामिछानेसाठी विश्वचषक खेळणे कठीण –

संदीप लामिछानेला व्हिसा मिळवून देण्यासाठी नेपाळ सरकार प्रयत्नशील असले, तरी लामिछाने टी-२० विश्वचषक स्पर्धेत सहभागी होण्यासाठी अमेरिकेला जाण्याची शक्यता नाही. आयसीसीच्या नियमांनुसार २५ मे पर्यंत कोणताही संघ आपल्या संघात बदल करू शकतो, परंतु आता संघात कोणताही बदल केल्यास आयसीसीच्या तांत्रिक समितीची मान्यता घ्यावी लागेल.

हेही वाचा – फ्रेंच खुली टेनिस स्पर्धा : श्वीऑटेकचा संघर्षपूर्ण विजय; ओसाकावर मात; सबालेन्का, सिन्नेर, मेदवेदेवचीही आगेकूच

उच्च न्यायालयाने लामिछाने दिला होता दिलासा –

नेपाळच्या पाटण उच्च न्यायालयाने १५ मे रोजी लामिछानेवरील लैंगिक शोषणाच्या आरोपांप्रकरणी अंतिम निकाल दिला होता. संदीप निर्दोष असल्याचे न्यायालयाने म्हटले होते. काठमांडू जिल्हा न्यायालयाने दिलेला शिक्षा आणि दंडाचा निर्णय न्यायालयाने रद्द केला. खरं तर, यापूर्वी काठमांडू जिल्हा न्यायालयाने संदीपला बलात्कार प्रकरणात दोषी ठरवलं होतं आणि त्याला आठ वर्षांची शिक्षा सुनावली होती. याशिवाय ५ लाखांचा दंडही ठोठावण्यात आला होता. गेल्या वर्षी १३ डिसेंबर रोजी न्यायालयाने त्याला बलात्कार केल्याप्रकरणी दोषी ठरवले होते.

हेही वाचा – क्रिकेटची खरी मजा ११ खेळाडूंनी खेळण्यातच!; ‘प्रभावी खेळाडू’च्या नियमाबाबत भारताचा यष्टिरक्षकफलंदाज जितेश शर्माचे मत

लामिछाने जगभरातील अनेक लीगमध्ये सहभाग घेतलाय –

लामिछानेने बिग बॅश लीगसह जगभरातील अनेक टी-२० लीगमध्ये भाग घेतला आहे. संदीपने नेपाळकडून आतापर्यंत ५१ वनडे आणि ५२ टी-२० सामने खेळला आहे. त्याच्या नावावर ५१ एकदिवसीय सामन्यांमध्ये ११२ विकेट्स आणि ५२ टी-२० आंतरराष्ट्रीय सामन्यांमध्ये ९८ विकेट्स आहेत. याशिवाय संदीपने आयपीएलमध्ये नऊ सामने खेळला असून १३ विकेट्स घेतल्या आहेत. एकूणच संदीपने जगभरातील लीगसह एकूण १४४ टी-२० सामने खेळला आहे. यामध्ये त्याने २०६ विकेट्स घेतल्या आहेत. संदीपच्या नावावर प्रथम श्रेणी क्रिकेटमध्ये तीन विकेट्स आहेत आणि लिस्ट-ए मध्ये त्याच्या नावावर १५८ विकेट्स आहेत. संदीपची वनडेतील सर्वोत्तम कामगिरी म्हणजे ११ धावांत ६ विकेट्स आहे. त्याच वेळी, संदीपची टी-२० आंतरराष्ट्रीय क्रिकेटमधील सर्वोत्तम कामगिरी म्हणजे नऊ धावांत ५ विकेट्स आहे.