आयसीसी टी२० विश्वचषक २०२२ मध्ये आज न्यूझीलंडविरुद्ध आयर्लंड सामना सुरु आहे. उपांत्य फेरीच्या दृष्टीने न्यूझीलंडसाठी महत्वाच्या असणाऱ्या आयर्लंडविरुद्धच्या सामन्यात न्यूझीलंडच्या फलंदाजांनी दमदार फलंदाजी करत १८५ धावा केल्या. आयर्लंडने नाणेफेक जिंकत प्रथम गोलंदाजीचा निर्णय घेतला आणि तो त्यांना महागात पडला. आयर्लंडला विजयासाठी १८६ धावांचे आव्हान असणार आहे आणि हे आव्हान न्यूझीलंडची गोलंदाजी पाहता फार सोपे असणार नाही.
न्यूझीलंडची सुरुवात फार खराब झाली.पहिल्या तीन षटकातच त्यांनी दोन गडी गमावले होते. १२व्या षटकात डेलनीने डेव्हॉन कॉनवेला मार्क एडेरकरवी झेलबाद केले. त्याने ३३ चेंडूत २२ धावा केल्या. कॉनवेने आपल्या खेळीत दोन चौकार मारले. यानंतर १४व्या षटकाच्या पहिल्या चेंडूवर डेलेनीने ग्लेन फिलिप्सला डॉकरेलकरवी झेलबाद केले. फिलिप्स नऊ चेंडूत १७ धावा काढून बाद झाला. फिलिप्सने आपल्या खेळीत दोन चौकार आणि एक षटकार लगावला. १४ षटकांनंतर न्यूझीलंडची धावसंख्या तीन गड्यांच्या मोबदल्यात ११८ अशी स्थिती होती. त्यानंतर कर्णधार केन विलियम्सनने डेल मिशेल सोबत ६० धावांची भागीदारी करत संघाचा डाव सावरला. विलियम्सनने ३५ चेंडूत ६१ धावा केल्या. तर मिशेलने २१ चेंडूत ३१ धावा केल्या.
जोश लिटिलने कमाल गोलंदाजी करत या विश्वचषकातील दुसरी हॅटट्रिक केली. १८व्या षटकात त्याने केन विलियम्सन, जिमी निशम आणि सेंटनर यांना एकापाठोपाठ बाद केले. त्याने ४ षटकात २२ धावा देत ३ बळी घेतले. गॅरेथ डेलेनीने ४ षटकात ३० धावा देत २ गडी बाद केले. तर मार्क एडेअर १ गडी बाद करत त्यांना साथ दिली.
उपांत्यफेरीतील प्रवेशाच्या दृष्टीने हा सामना न्यूझीलंडसाठी खूप महत्त्वाचा आहे. जर हा सामना जिंकला तर उपांत्य फेरीत पोहचणारा पहिला संघ असेन. आयर्लंड संघाचे आधीच या विश्वचषकातील आव्हान संपुष्टात आले आहे. त्यामुळे हा सामना न्यूझीलंडसाठी फार आवश्यक आहे.
